Page 30 - MIN ARENDS

http://www.24ora.com/index.php?option=com_content&view=article&id=121500:encuanto-e-rol-di-
banconan-pa-cu-e-business-na-aruba-kvk-a-tene-un-reunion-importante-cu-cba-y-aba-
&catid=1:local&Itemid=5

Minister Arends orguyoso di por a participa den trece alegria

den bario di Sero Pita

Friday, 05 May 2017 19:18
Comparti

Despues di 8 aña como hefe di Gabinete di Minister de Meza, a toca turno pa prome biaha pa Richard
Arends, Minister di Asuntonan Economico, pega e prome luz LED den e bario di Sero Pita. Esaki tabata
un honor grandi pa e mandatario, pa mira cu Gobierno ta cumpli cu deseonan di e pueblo.

Diahuebs den oranan di anochi a cende e prome punto di iluminacion nobo, den un area di Sero Pita cu
pa hopi aña largo a biba den scuridad. Mas punto di iluminacion di caya ta forma parti di e programa Luz
den Bario cu Gabinete Mike Eman a cuminsa cune for di 2012. Cende un punto di luz nobo mas den
bario, Minister Arends bisa “ta yenami cu satisfaccion pa mira cu un iniciativa cu Gabinete Mike Eman a
tuma algun aña pasa caba ta wordo ehecuta.” Durante e periodo cu Mike Eman tabata den oposicion, ya
caba a cuminsa cana den bario pa habri scucha deseo di habitantenan. Ta basa riba e caminatanan aki cu
despues a bira Accion di Bario, como Gobernante, a scucha cu un di e preocupacionnan di hopi habitante
ta e falta di iluminacion den nan bario of di caminda cerca di nan bario/cas. Prome Minister Mike Eman
den estrecho cooperacion cu Minister di Utilidad e tempo ey, Mike de Meza y Minister di Infrastructura
no solamente a crea e programa Luz den Bario, pero tambe a yega na e decision pa cambia tur e
bombiyonan convencional di luz di caya pa tiponan LED. Basa riba e eficiencia di luznan LED, por a logra
na crea rond di 3000 punto di iluminacion nobo den barionan rond di Aruba. Minister Arends a bisa cu
iluminacion den bario ta garantisa siguridad cerca e habitantenan y alabes ta permiti cu e habitantenan
ta intercambia cu otro. “Hopi biaha bo ta haya barionan cu ta biba den scuridad, cu habitantenan tin
masha poco contact cu otro. E iluminacion lo yuda na fortifica e fibranan cu ta mantene nos sociedad.
Pesey mi kier felicita e habitantenan di Sero Pita. Tin hopi trabou ainda pa haci. Esaki ta un stap mas den
metanan cu Gobierno tin.” El a agrega cu e luznan cu ta wordo poni ta LED, cu ta cuadra cu e maneho
sostenibel di Gobierno .