Page 15 - HOH

Idea ta pa Hospital cuminsa cu 2 cama y den futuro lo bira 4 cama p’e monitoring di
pashent. Tin hopi pashent cu ta drenta Hospital tur siman cu stroke y e idea di e Stroke
Unit ta cu e enfermera specialisa den neuro por observa e pashentnan cu mester di
hartbewaking.

E diferencia grandi cu tin den e kamber aki y cualkier otro kamber, ta cu pashentnan aki
ta na monitor y e enfermeranan ta mira nan constantemente.

Ta custumbra di haci esey den Intensive Care, pero awor lo por aplica esaki tambe aki.
Riba e seccion mes tin 4 cama caba, pero a habri 2 oficialmente pa haci hartbewaking pa
pashentnan di stroke. Esaki ta un logro hopi grandi, sra. Ruthmila Odor-Croes a duna di
conoce.

Un pashent cu a haya stroke mester di hopi sosiego, specialmente e prome 72 ora. Unabes
cu e prome 72 oranan pasa ta importante p’e famia ta parti di e proceso unda cu nursenan
ta splica e famia con pa yuda nan ser keri.

Tin stroke mas leve manera un TIA (Transient Ischemic Attack) of strokenan hopi pisa y
e pashent mester siña ful di nobo con pa biba cu e banda cu ta bon y con pa stimula e
banda cu no ta bon di man of pia.

E lo mester siña papia di nobo, siña guli y haya rehabilitacion pa recupera mihor posibel.

Dr. Keuter, Neurologo, a duna di conoce cu a haci nan maximo esfuerso durante e
proceso pa bin cu un Stroke Unit. Si un pashent cu stroke yega na emergencia, e
enfermera di Neurologia mes ta baha busca e pashent y bay cun’e riba B3 pa control’e.
Asina aki ta gana tempo.

Loke ta hopi importante t’e Team di Stroke Unit, pasobra tur hende den Hospital por
acerca y puntra e team cualkier informacion cu tin mester pa cuido di pashent.

E proceso pa tin un Stroke Unit no tabata facil, pero poco poco a yega n’e resultado
bunita aki danki na un y tur cu a yuda haci esaki posibel.