Page 17 - AHATA

A17
HENDE Dialuna 10 Juni 2019
Despues di 15 aña:

Vuelo inaugural di American Airlines non-stop pa La Guardia, NY

ORANJESTAD – Aruba Tourism Authority ta contento
pa comparti cu e weekend cu a pasa, American Airlines
lo inicia su vuelo directo di New York (La Guardia) pa
Aruba. Esaki lo inicia respectivamente tur diasabra for
di dia 8 di juni 2019 cu un total di 30 vuelo pa e aña aki
cu ta representa 2.880 asiento. American Airlines te cu
awo ta ofrece e posibilidad pa conecta for di aeropuer-
to John F Kennedy, via Charlotte of Miami, pa Aruba.
Tambe tin vuelonan non-stop for di Philadelphia, Chi-
cago (seasonal introduci aña pasa) y Dallas (introduci
aña pasa).

Trabou den ekipo di Aruba Airport Authority (AAA), Aruba
Tourism Authority (A.T.A.), Ministerio di Turismo, AHATA,
DCA e.o. y otro socionan ta keda instrumental. E vuelo nobo
ta asisti den expande e mercado den e area Noreste di Merca.

Ronella Tjin Asjoe-Croes a indica e.o. cu “E ruta nobo aki ta
duna e bishitantenan for di up-state New York y bisindario
manera New Jersey y Connecticut pero tambe esunnan cu
ta bishita nos por ehempel for di Canada, via vuelonan cu ta
conecta cu Aruba, un manera mas pa bishita nos destinacion.
Awo e pasaheronan fiel cu semper ta biaha cu American Air-
lines por sigui disfruta di nan aerolinea faborito cu un otro
oportunidad di biaha cu e vuelo non-stop pa nos isla.”

Ta interesante pa sa cu pa loke ta trata e servicio nobo aki di
American Airlines, tin solamente dos vuelo non-stop for di La
Guardia pa e region Caribense, esey ta pa Bahamas y pa nos
isla Aruba.
For di e aeropuerto John F. Kennedy e unico non-stop flight
cu American Airlines tin pa Caribe ta pa e destinacionnan An-
guila, Haiti, Puerto Rico y St. Thomas.

Aruba a cosecha crecemento for di e mercado Mericano aña
pasa compara cu aña 2017 cu un total di 6.7% mas (742.016)
bishitante for di Merca. Durante 2018, New York a sigui ta e
mercado mas grandi di Merca cu un total di 20% di e total di
bishitantenan cu ta biaha pa nos destinacion. Aruba ta sigui
expande den e mercadonan primario na Merca y ta bon pa
menciona cu e expansion aki ta cuadra perfectamente cu e
strategia pa atrae bishitantenan afluente, cu ta concentra entre
otro den e parti Noord Oost di Merca.

American Airlines ta conectando Merca y Aruba cu su vue-
lonan for di diferente destinacion desde aña 1971 y ta un socio
clave. Cu introduccion awo di La Guardia, e aerolinea ta sirbi
6 gateway for di e mercado di Merca.

Presente di parti di American na e ceremonia di corta cinta ta-
bata Sr. Nelson Cortes (station manager), y tambe represent-
antenan di e autoridadnan di gobierno y aeropuerto, incluy-
endo Minister di Turismo Sr. Dangui Oduber, CEO di AAA
Sr. James Fazio CEO di Aruba Tourism Authority (ATA) Sra.
Ronella Tjin Asjoe-Croes y presidente y CEO di AHATA Sra.
Tisa LaSorte.

“Nos “footprint” den Caribe ta algo cu nos aerolinea ta or-
guyoso di dje, mirando cu nos ta e aerolinea lider den region
cu servicio pa 38 destinacion y faltando mas pa agrega na e lis-
ta,” asina Alfredo Gonzalez, American su Managing Director
pa Caribe a comenta. “December ultimo nos a sigui expande
nos footprint na Aruba, cu servicio nobo for di Dallas/Fort
Worth y Chicago, y cu e buelo nobo aki nos ta brinda Aruba
na un di e mercadonan di mas importante den Merca, New
York, haciendo Aruba su posicion mas fuerte como destina-
cion turistico.”

“Nos ta duna bonbini na e buelo di LGA cu brasanan habri,”
CEO di AAA Sr. James Fazio a comenta.

Trabou den ekipo di Aruba Airport Authority (AAA), Aruba
Tourism Authority (A.T.A.), Ministerio di Turismo, AHATA,
y e.o. DCA ta keda instrumental y un biaha mas ta resulta
den exito. Mescos ta conta pa e ekipo di American Airlines na
Aruba, cu pronto lo ta celebrando 50 aña di American Airlines
na nos isla!