Page 25 - AVP
P. 25
Endy Croes a señala cu Lotto tin cu duna e Comision di Subsidio e suma di 4 miyon pa
aña, pa deporte y esey ta den un contrato, pero e siman aki e comision aki no tin placa.
El a haci un yamada na Lotto pa Deporte pa cumpli cu esaki mas pronto posible y na un
manera structural.
“No por ta asina cu tur e federacionnan mester pasa un caminda di Cruz pa yena tur
documento, pa haya aprobacion di e Stichting y actualmente e caha di ‘Stichting
Subsidie Committee’ ta bashi. Y mi ta bisa esaki cu confirmacion pasobra mi sa cu e ta
asina”, e Parlamentario a señala.
Endy Croes a agrega cu e ta bay manda preguntanan pa e minister, aunke e sa cu e
canal entre e mandatario y Lotto ta cera, y e ta manda e mensahe tambe pa e
compania concerni na Canada, cu tambe ta culpable di esaki.
E mester sa cu e Comision di Subsidio cu ta representa tur federacion deportivo, tin
derecho di haya su placa na un manera structural.
Tambe e sa cu tin hopi cos cu a bay robes, y cu tabata tin hopi fiesta den Lotto pa
Deporte, tempo di sra. De Sousa cu no tey mas y Silvio Janga, amigo di Mike de Meza.
Croes a expresa cu MEP sa di tur e fechorianan di esnan di Lotto.
Parlamentario Endy Croes ta haya cu esey no ta motibo pa keda sin traspasa e “fair
share” cu e Stichting Subsidie Committee tin derecho riba dje.
“Y nos ta para cu nos pechi di parlamentario, y como Presidente di e Comision Fiho di
Deporte, banda di e deportistanan pa asina tur e federacionnan cu tin aprobacion pa
nan programa di aña 2019, por haya conforme nan agenda y nan programa di henter
aña, nan placa structuralmente pa deporte por draai”, Croes a subraya.
El a subraya cu deporte ta algo di vital importancia pa un comunidad. E ta forma un
caracter, un persona, un mehor ser pa e futuro di Aruba, y e ta kere fervientemente
den inverti den deporte, y e meta cu Lotto a wordo lanta ta netamente esey y e ta
spera cu na Augustus por tin un decision di Huez riba e caso aki, y cu e minister tin
oportunidad di coregi tur e fechorianan cu a pasa e ultimo ocho añanan eyden y duna
contenido na su vision y su programa.
