Page 60 - AVP

Scolnan cu pa prome biaha desde 1965 a cuminsa aña di scol sin ta sigur di cua plan o
curiculo lo usa. Pa prome biaha for di 2008 tin alumnonan cu ta habri aña di scol sin ta
sigur cu tin lugar na scol. Maestronan di scol cu no sa a base di cua regla nan lo wordo
paga.

Problemanan den scolnan cu ta djis wordo neglisha y hala un banda. Meta di Minister pa
“digitalisa enseñansa” no ta nada nobo y revolucionario manera e ta pretende, pero hasta
e meta aki no ta alcansabel, pasobra scolnan a mustra riba e falta di internet, computer,
programanan digital y training necesario pa por traha den forma digitalisa y organisa.

Segun Rene Herde, esaki ta djis parti di e reclamonan concreto di maestronan di scol. Ta
logico cu tur e puntonan aki mester a wordo atendi prome cu scol a habri, pero a neglisha
esakinan.

E consecuencia di esaki t’e inclaridad, inseguridad y intrankilidad pa enseñansa den
mucho hopi scol.

Ora un organisacion falta asina hopi punto esencial, e no por funciona bon. E ta funciona
caotico. Tin falta di maneho y desicion cla cu tur hende sa y ta compronde. E falta di
claridad y inseguridad aki a crea e situacion caotico den enseñansa. Apesar di e esfuerso
y bon boluntad di masha hopi maestro di scol den henter enseñansa, nan falta e claridad
di maneho y sosten pa ehecuta esaki cu nan mester haya di gobierno!

DIRECION y DIALOGO
Enseñansa ta un area di maneho cu tin dos instrumento esencial na su disposicion:
claridad di direccion y dialogo cu trahadornan den enseñansa. Bon maneho pesey ta bin
di con bon ta comunica e metanan di enseñansa y con bon ta comunica cu trahadornan pa
logra e metanan aki.
Enseñansa ta un organisacion asina grandi, cu metanan di largo plaso, cu asina hopi
detaye y asina hopi hende envolvi, cu ta exigi bon comunicacion continuo y na tur nivel.

Enseñansa ta rekeri planificacion di largo plaso, di aña pa aña, di luna pa luna, di siman
pa siman. Bon enseñansa ta sosode ora tur e hendenan envolvi, alumno, maestro y
asistente, mayor, specialista y administradornan, traha den forma coordina pa logra
metanan cu a acorda.