Page 61 - AVP

Pesey enseñansa ta rekeri claridad di e metanan a largo plazo, pa por coordina trabou y e
accionnan di corto plazo.

Pero ora no tin claridad riba e metanan, maestro, alumno, scolnan no tin e informacion y
sosten cu nan tin mester pa actua den forma coordina.

E claridad y sosten aki cu e Minister y su specialistanan mester duna, no tey! Al
contrario, e Minister a crea inclaridad y incertidumbre den e dos añanan cu a pasa. E
comunicacion continuo y cu tur nivel den enseñansa, no tabatey of a caba na nada. Enbez
di dialogo, e Minister a neglisha loke el a tende, e ta sorprende hende cu su desicionnan
unilateral, e ta duna instruccion robez pa despues culpa otro di a compronde malo.

No tabatin un dialogo habri, di scucha bon y di inclui tur opinion den un forma balansa y
racional den tumamento di desicion. Cu e falta di claridad y dialogo, e Minister a bruha
tera y haci comunicacion normal imposibel.

Dos aña largo maestronan a purba te ora nan no tabata por mas y a perde tur confiansa
den e Minister di Enseñansa.

Mei-mei di falta di claridad riba futuro cercano riba forsa di compra pa mayoria di nos
cumindad, preocupacion serio den comercio, tension serio entre Aruba y Hulanda,
preocupacion p’e falta di integridad y abuso di poder den Gobierno, tin e chaos aki den
enseñansa tambe.

E bastion di seguridad y speransa pa futuro ta tambalea. Nos enseñansa ta den crisis
serio! Y ainda nos no a papia di e contenido desea, mehoracion di resultadonan y e
necesidad di renobacion, drs. Rene (Baba) Herde a finalisa su comentario.