Page 7 - HOH 16 MAY 2017

PLATAFORMA PROMOCION DI SALUD

PRESION HALTO TA UN ENFERMEDAD

PELIGROSO

May 16, 2017 Admin Uncategorized Leave a comment

ORANJESTAD, Aruba: Na Aruba 1 den cada 2 homber entre 25 pa 64 aña di
edad tin presion halto y pa hende muhe esaki ta 1 den cada 3. Presion halto ta
un enfermedad cu por bira peligroso si no trat’e na e forma corecto. Curason ta
un organo cu ta traha manera pomp y ta manda sanger via ader y benanan pa
tur parti bo curpa. Ora e curason no ta traha bon of adernan ta cerando, un
persona su presion ta subi mas di 120/80. Presion di sanger cu keda riba 120/80
pa un tempo largo, e ora ey ta papia di presion halto y esaki por haci daño na
diferente organo manera, e curason, celebro y riñon. Plataforma Promocion di
Salud, den cual tin representacion di Departamento di Salud Publico, IBiSA, AZV,
hospital dr. Horacio Oduber hospital, Wit Gele Kruis, ImSan y SVb ta recorda tur
hende cu presion halto por mata hende silenciosamente. Mas ainda durante 15
pa 26 di mei ta para keto na e factor di riesgo cu ta Presion Halto. Esaki
relaciona cu Dia Mundial di Presion Halto ta 17 di mei.

Ta normal cu presion di sanger ta varia durante e dia y esaki ta bin pa motibo di
e actividadnan cu un persona ta haci. P’esey un solo midi no ta suficiente pa
husga e presion di un persona. Plataforma Promocion di Salud ta recorda tur
hende cu mas ainda ta importante pa controla nan presion ora cu e edad ta riba
35 aña, mas ainda si algun miembro di famia tin presion halto of si e estilo di
bida no ta bon, manera bebe hopi alcohol, tin hopi stress, ta huma sigaria, come
menos saludabel, haci poco actividad fisico y\of peso di mas.

Tin manera cu por evita presion halto y un di nan ta ora ta mantene un nutricion
saludabel. Haciendo uzo di mas berdura y fruta ta haci cu e sanger ta menos diki
y esaki ta baha e presion di ader y benanan. Berdura y fruta ta contene poco
vet, tiki of nada di salo, no ta contene colesterol y ta rico na potasio. Ta
importante pa sa cu potasio ta yuda baha presion. Algun producto saludabel cu
ta contene fibra ta yuda. Producto cu fibra ta grano menos procesa manera aros
bruin y pan integral, esta bruin y volkoren, bonchi manera bonchi wowo preto,
bonchi cora; fruta y berdura fresco of di diepvries. Tambe por haci un
combinacion pa aumenta e cantidad di fibra, manera batata cu spinazie of pasta
cu broccoli.