Page 8 - HOH 16 MAY 2017

Cushina cu hopi salo ta pone cu e presion ta subi y p’esey ta recomendabel pa
uza menos salo. Esaki ta bin pa motibo cu salo ta wanta likido. Ta importante pa
corda cu ora di prepara cuminda, haci uzo di menos salo, no pone salo na mesa,
cuminda cumpra afo mayoria biaha tin hopi salo, evita di come snacksnan salo,
siña prepara cuminda cu diferente condimento fresco. Hopi hende no ta lesa e
envoltura ora di cumpra un producto, pero ta importante pa lesa esaki pasobra
por mira cuanto sodium tin den dje. Bon pa sa cu ora tin indicacion di “low
soduim”, cu e producto ta contene 140 mg di sodium y percura pa no uza mas
cu esaki. Ora tin indicacion di “very low sodium” e contenido ta 35 mg di sodium
y sodium free ta contene solamente 5 mg di sodium of menos.

Bahamento di peso tambe ta nifica e posibilidad pa haya presion halto ta bira
menos. Pa por logra esaki ta bon pa inclui producto saludabel, come na midi y
come menos cuminda hasa. Haciendo esakinan tambe ta yuda reduci e riesgo di
haya otro enfermedad manera diabetes of problema di curason y hopi mas.
Plataforma Promocion di Salud ta recomenda pa haci mas actividad fisico pa
yuda baha e peso. Por cuminsa cana 3-5 biaha pa siman te yega na e
recomendacion pa tur dia por lo menos mey ora. Prome cu bo cuminsa cu
cualkier programa di ehercicio of cambio drastico den comemento, consulta cu
bo dokter di cas. Limita e uzo di alcohol, pasobra alcohol tambe por subi un
hende su presion door di pone e curason bati mas lihe. Humamento y stress
tambe ta hunga un rol importante den presion halto.

Presion halto ta un enfermedad peligroso, p’esey ta importante pa esnan cu tin
esaki bebe nan pildo di presion manera mester ta, bebe hopi likido y no come
nada di salo agrega. Siña conoce bo curpa, controla bo presion regularmente
cerca bo dokter di cas, na un instancia di salud of si tin un mashin di presion na
cas por haci esaki semanalmente. Tambe por acudi na Bus di Salud si esaki ta
den bo bario of na pia di bo trabou.