Page 43 - ARUBA BANK

Den un democracia Parlamentario e deseonan di Parlamento ta para na prome lugar riba e
deseonan di Gobierno. Den un democracia Parlamentario no tin espacio pa maniobranan
di Gobierno cu no ta resorta bou control Parlamentario.

Den cuadro di e cambionan di e LAft Gabinete Wever-Croes ta duna e impresion
comosifuera cu un amienda di Staten no ta nada mas cu un conseho y cu Gobierno
motivando esaki por pon’e un banda. Gabinete ta pensa cu sin consecuencia
constitucional por dicidi riba su mes pa no ofrece un decreto gubernamental aproba pa
Gobernador ratifica.

Ora un Gabinete, bou di e circumstancianan aki, no entrega su retiro na Gobernador,
esaki no solamente ta muestra di un falta di conocimento grandi di e principionan basico
constitucional di nos democracia Parlamentario, pero tambe di un falta di respet p’e
organo legitimo mas halto di nos pais.

Di acuerdo cu Mike Eman, den un sistema democratico cu ta funciona bon e Gabinete
mester ta consciente cu dor di no laga ratifica un decreto pa motibo di un diferencia
profundo di opinion pa loke ta cierto areglo den e decreto, e Gabinete ta viola e regla di
confiansa.

Aparte di esaki Premier Wever-Croes a “misleid” tanto Parlamento como Conseho di
Reino den forma mahos.

Prome el a actua di mala fe dor di gaña Conseho di Reino dor di no a haci su esfuerzo pa
logra un sosten di mayoria den Parlamento p’e protocol cu e hunto cu Hulanda a firma.

Durante tratamento di e amienda cu tabata conflictivo cu e areglo cu tabatin cu Gobierno
di Reino, riba un pregunta categorico di miembro di Staten mr.drs. Richard Arends,
Premier Wever-Croes no a conseha Parlamento pa vota contra, pero de facto a duna un
stemadvies positivo p’e amienda.

Di e forma aki Premier Wever-Croes a actua di mala fe, prome dor di misleid den forma
impertinente Gobierno di Reino y despues Parlamento dor di no ratifica e
landsverordening amenda di CAFT, pa cual amienda e mes a duna un conseho positivo.