Page 44 - ARUBA BANK

Mientrastanto e promesanan bashi di Wever Croes ta bira mas y mas hopi, mientras e y
su Gabinete no tin problema pa torno n’e fundamentonan di nos estado di derecho:
Hueznan ta wordo malamente difama dor di Ministernan of simplemente ignora,
oponentenan politico, periodistanan critico y partnernan social ta wordo persigui,
intimida y e principionan basico ta wordo poni un banda y Gobierno di Reino ta wordo
misleid ki ora cu e Gabinete aki kier. Mentiranan ta aspectonan cronologico y sistematico
di Premier Wever-Croes, Mike Eman a sigui comenta.

Lamentablemente e desaroyonan aki ta muestra con den un periodo relativamente cortico
y liher cosnan den comunidad ta biniendo abou. Dor di e forma con e Gabinete aki ta
anda cu cierto asuntonan, complica dor di su promesanan falso durante campaña,
Gabinete Wever-Croes ta perde tur credibilidad.

Pa loke ta e misleiding di Parlamento, Conseho di Minister di Reino y e pueblo di Aruba,
Wever-Croes mester saca su conclusion y baha.

Ex Premier Eman (AVP) ta corda con na mei 2015 su Gabinete a firma un protocol cu
Gobierno di Reino y ya na augustus esaki a haya su base legal den un ley y ratifica dor di
Gobierno.

“Nos tabatin nos diferencianan di opinion cu e gobernantenan Hulandes na defensa di e
autonomia di Aruba. Pero, unabes cu e acuerdonan a wordo cera dentro di e cuadranan di
nos regimen constitucional y Statuut – con dificil esaki por tabata – nos a mantene nos
mes n’e protocolnan firma y palabracion haci”.

E mal ehempel aki di engañonan impertinente di Premier Wever Croes no ta refleha loke
Aruba ta para p’e y e kiebro di e regla di confiansa (vertrouwensregel) no por keda sin
consecuencia.

Pesey mes e Gobierno aki mester bay cas y si esey no sosode e ora un Parlamento cu ta
respeta su mes mester oblig’e baha, Mike Eman a conclui.