Page 96 - MIN JUS

Polis "A La Pelicula" ta blokia auto cu chauffeur cu arma di
candela

Thursday, 25 May 2017 17:55
Comparti

Wowo di Pueblo ta e garantia pa seguridad di henter e comunidad. Polisnan a base di un tip a gara un
chauffeur arma riba e caminda principal na altura di Balashi pabou di e brug.
Central di Polis a haya e melding di e auto Honda A-62086 cu tabata na un negoshi y eynan un
ciudadano atento a miranan cu arma di candela. E informacion duna tabata hopi zuiver. Polisnan di
Playa, Noord, Santa Cruz y San Nicolas a cuminsa busca e auto. Den un corto tempo a drenta
informacion di e patruya di San Nicolas cu nan ta tras di e auto banda di Savaneta. Nan ta algun auto su
tras y bayendo Playa. A cuminsa prepara mas unidad pa presenta den cercania pa asina haci e detencion.
E auto a pasa Savaneta y drenta Pos Chikito. A pasa e rotonde bay direccion Balashi. Pabou di e brug nan
a logra para e auto estilo pelicula. A blokia e auto di dilanti y patras y pone tur hende baha cu man na
laira. Un tremendo trabou di Polis cu a usa e tacticanan necesario y cu e seguridad na prome lugar pa
asina haci e detencion. Tin mas cu un detencion cu a tuma lugar. Den e auto tabata tin un señora cu lo ta
mama di un di e sospechosonan y tambe un mucha. Esakinan a wordo atendi na un forma diferente.
Sigur un tremendo trabou di Polis pero tambe un tremendo melding di un ciudadano atento. Polis a
confisca e arma y e auto. Na warda a keda di listra e auto mas profundo. Tambe a keda di bay chek mas
leu si e arma cu ta asina real ta di berdad tambe. Tin hende ta move cu armanan similar na Polis pero ta
armanan di airsoft gun. Asina mes e polisnan a confirma cu tin un arma di candela den e auto. Esnan
deteni ta uno cu actualmente ta traha na un Hotel Highrise conoci na area di Malmok y e otro tambe
tabata traha eynan un tempo. Kiermen ta dos colega cu tabata hunto den e auto cu a haya arma. Nan
inicialnan ta R.T. y J.C.

Ultimo información ta cu e arma no tabata di berdad. Después di investigación na warda a laga ambos
persona deteni den libertad.