Page 44 - Djaluna 29 oktober 2018.pdf

44 Djaluna 29 òktober 2018
Shofùr ta haña

chèns pasó el
a paga butnan
habrí

WILLEMSTAD.- Den e
lastu lunanan aki di aña,
hopi kontròl di tráfiko lo
bai tuma lugá riba nos
kareteranan. Polisnan
lo para pa kontrolá na
diferente sitio i tambe lo bai
wak si e shofùr tin but habrí
i no a kumpli kuné.
Si esaki no ta e kaso sea
e shofùr tin ku paga e but
òf drenta un areglo di pago.
Si e butnan promé ta pagá,
esaki sigur por tin benefisio
pa e shofùr.
Resientemente durante
un di e kasonan di
infrakshon di tráfiko, un
shofùr a presentá dilanti
hues, pa splika korte dikon
e no ta di akuerdo ku e but
ku el a risibí.
Segun fiskal, e shofùr a
wòrdu pará den oranan lat
di anochi pa un kontròl di
tráfiko.
Fiskal a duna di konos’é
ku tur papel tabata na òrdu,
pero e shofùr no tabatin
su reibeweis i a bisa nan
ku el a lubid’é den un otro
vehíkulo.
E shofùr a bisa korte
ku apesar ku el a splika e
agentenan esaki i primintí
ku e lo trese e reibeweis pa
nan na warda, tòg nan a
dun’é un but.
Durante tratamentu di
e kaso e shofùr a saka su
reibeweis pa mustra hues
ku su reibeweis tabata
bálido na momento ku polis
a par’é.Fiskal a bisa ku e
no ta mira motibu pa no
kere e loke e shofùr a konta
i pa e bia aki lo e dun’é un
chèns, pa motibu ku den
pasado e shofùr a haña mas
but i a kumpli ku e pagonan
manera mester ta.
E shofùr a splika hues
ku e dia promé ku polis a
par’é, e tabata kore den un
otro vehíkulo i a saka e
reibeweis hink’é den e baki
mei mei di e outo i lubid’é.
Segun e shofùr, kabes
yen el a sali lubidá pa kue
e reibeweis bèk.
El a splika ku na
momento ku polis a par’é
el a buska tur kaminda
pero despues a kòrda ku su
reibeweis a keda den e otro
outo.
Fiskal a bisa ku mirando
ku e shofùr a kumpli ku e
otro but nan, e ta dun’é un
chèns pa e bia aki.
Hues den su desishon
a bai kompletamente di
akuerdo ku fiskal.