Page 44 - AVP

Durante e debate den Parlamento diahuebs ultimo tabata visibel e desconfiansa cu AVP tin den Richard
Arends. Richard Arends tabata e persona cu a traha e ley di LAFT cu ta e ley cu a percura pa mina nos
autonomia financiero entregando esaki na e organo Hulandes CAFT. Pa por a logra esaki mester a traha un ley

totalmente inconstitucional cu lamentablemente un parlamento sin weso di lomba a aproba na 2015. Y sigur
den e reunión di 6 di juni 2019 fraccion di AVP a demostra nan desaprobacion na nan colega Richard Arends.

Caso di Richard parce esun di Juan David

Ora mi a wak con su mesun coleganan di fraccion di AVP a laga su persona na caya, unda na momento cu sr.

Arends tabata papia hasta su coleganan a bandona sala, lagando su persona manera Mike Eman a laga ex
Minister di Finansa Juan David Irausquin su so benta den gang na Den Haag. Mike Eman a percura tras di su
lomba pa cera tur porta pa e no ser atendi y unda cu e mester a bin Aruba y tuma su retiro, pasobra e no por a
impedi di haya un KB cu Mike Eman mes a percura pa Aruba haya door di un mal maneho for di 2009 caba.

Y e mesun caso awor mi persona a sinti cu Richard Arends kende no tin confianza mas di su partido y di su
coleganan di fraccion di AVP. Su coleganan a laga su so ta purba defende su ley y unda si ta bon coleganan
manera Marlon Sneek, Mervin Wyatt-Ras, Jennifer Arends-Reyes, Mike de Meza, Benny Sevinger, Arthur
Dowers, amigonan di Gabinete Eman 1 y 2 y sigur e parlamentarionan cu a aproba e ley inconstitucional aki,

pues un ley cu ta contra nos Status Aparte, mester a yuda Richard Arends defende e ley aki, pero nan a scoge
pa keda keto y nan silencio so ta comproba caba cu nan tabata contra Richard Arends e tempo aya y awor mas
cu nunca e no ta conta mas cu nan sosten y esaki a ser demostra ora e tabata hiba su disertacion unda nan a
cana bay lagu’e.

Tuma honor na bo mes y retira

Despues di a strica placa di pueblo via su compania di consulta conoci como Horizon unda el a strica alrededor
di 3 miyon florin cu nos por a saca afo den un periodo di menos cu 3 aña, y a percura pa traha un ley cu ta
mina nos autonomia financiero cu ta e base di nos Status Aparte, traicionando un pueblo cu a bringa pa por

logra esaki, no ta keda ningun otro conclusion cu Richard Arends mester tuma honor na su mes pa tuma su
retiro. Mi tin sigur mirando e postura di su coleganan di Fraccion di AVP esaki ta mas cu claro cu nan no ta
sostene su persona y e acto aki di hasta bandona sala mientras cu su persona tabata hiba su disertacion, ta
indicacion fuerte cu den AVP no tin confianza mas den Richard Arends y cu a yega momento cu su persona

mester di tuma su retiro.