Page 30 - AHATA

“Lider di Oposicion den Parlamento Marlon Sneek na e momento aki ta hunga un papel
sumamente importante den Parlamento cu mester trata un caso cu ta afecta
credibilidad di Parlamento,” a wordo treci dilanti.

El a referi na e hecho cu ya e caso di Richard Arends cu lo a wordo nombra gerente
financiero di Refineria di Aruba, a drenta un etapa nobo. “Na prome momento tabata
duda si Prome Ministro Evelyn Wever-Croes tabata tin rason ora el a acusa Richard
Arends di no a entrega informacion corecto ora el a asumi su puesto den Parlamento. A

resulta cu Prome Ministro tabata tin rason,” a wordo indica.

Awor e situacion ta bira mas serio debi na e acusacion di miembro di Parlamento, Endy
Croes, cu a presenta documentonan cu ta indica cu dos pago en todo caso lo a wordo

haci dor Refineria di Aruba cu aprobacion di tanto e director di e tempo Koolman como
di Richard Arends.

Ta trata di dos pago na compania di construccion, menciona riba dos copia di e

informacion computerisa di pago realisa dor di Refineria di Aruba.

Lider di Oposicion Marlon Sneek mester bini dilanti den Parlamento cu mester exigi na
nomber di pueblo determina e pasonan cu mester tuma den e caso aki.

Ta wordo mustra cu claramente mester bay determina con cambionan ta wordo haci
den ley pa facilita actuacion contra situacionnan manera esun cu e presenta.

“Segun e documentonan cu a bini den publicidad, Richard Arends a practica mentira y a
insisti den esaki hasta ora e asunto a bini den publicidad,” a wordo remarca na DIARIO
cu awe ta presenta e copianan cu ta den publicidad.

Mester bay determina pakico mester a recore na mentira den e caso aki y tambe
investiga e hecho cu a wordo haci posibel pa na un forma secreto, Richard Arends por a
keda cu su nombramento na Refineria di Aruba siendo e ta Ministro y despues miembro
di Parlamento.

Den e caso aki mester tene cuenta cu miembronan di Parlamento ta wordo paga pa nan
traha den Parlamento mientras e hecho cu aki ta trata di refineria, cu ta parti di e
acuerdo Citgo cu ta na discusion, tambe ta hunga un papel.