Page 28 - AHATA

E finanza di gobierno y e maneho financiero di Aruba no ta den orden. Gobierno ta tuma
mucho poco medida, pa yega na un mehoracion duradero di finanzas publico y un bahada
di gasto di personal. E dependencia di ayudo incidental ta mucho grandi y e necesidadnan
di reforma no ta atendi suficientemente. Como tal e debe di Aruba a aumenta
innecesariamente.

RISICO

“CAFt ta premira diverso risico y como tal ta pidi medida adicional necesario, pa yega na
un finanzas publico duradero, manera cu a palabra cu Hulanda y e protocol di 2018 y
conforme LAFt”, e carta ta sigui bisa. A sigui un serie di proceso stipula segun e ley di
LAFt basa riba presupueso 2018, unda cu e partidonan tin di scucha y haya oido, di cual
Aruba a haya varios chens pa drecha nan situacion. “Pero no a duna oido na e
palabracionnan haci”, CAFt ta bisa. Pa presupuesto 2019 un biaha mas a inicia cu e
proceso di scucha y haya oido. Aki tabata importante pa inclui e norma di personal di
SCP (Sociaal Crisis Plan). E proceso a termina cu un mensahe na RMR, cu Aruba lo
mester a laga mira den e prome UR (Uitvoerings Raportage) 2019, cu a cumpli cu esaki.
Pero, esey no tabata e caso atrobe! Aki atrobe a cuminsa e proceso ya conoci. Despues
tabata e propio Secretario di estado Hulandes, Raymond Knops, cu na nomber di RMR
mes, a duna Aruba ‘un chens’ pa cumpli cu e recomendacionnan di CAFt. Aki, segun
CAFt, Aruba a laga sa, cu nan no lo cumpli cu tur e recomendacionnan.

CULPA CONSEHO DI MINISTER

CAFt siguientemente ta constata cu Conseho di Minister, no obstante na diferente
‘yamada’, no a cumpli suficientemente cu e recomendacionnan di CAFt. Segun e Colegio
di Supervision, CDM (Conseho di Minister) mester ehecuta e palabracionnan di e
protocol.

CONSEHO

Mirando tur loke a indica, e carta di Gradus (CAFt) ta bisa, cu no ta keda nada otro di
raporta na RMR, pa duna Conseho di Minister di Aruba un instruccion (aanwijzing). “Ta
keda na RMR pa dicidi si realmente, e ta duna Aruba un instruccion. Prome cu duna e
instruccion, Conseho di Minister ta haya chens pa duna su vision” e carta ta finalisa
bisando. No ta conoci si e trayecto ta keda cla ‘na tempo’ pa e proximo Conseho di
Minister di Reino (RMR), cu ta dia 18 di october proximo. Lesa e carta AKI.