Page 18 - AWEMAINTA

18 AWEMainta Diahuebs, 11 Mei 2017

T’aki Tin pa Dia di Mama

T’aki Tin un iniciativa di Gobierno treciendo

actividad den Caya Grandi

E dilema di tur aña: “Kico mi por cumpra pa mi mama cu ta
diferente? Ke hubo si por shop pa mama hunto cu mama y asina
pasa un dushi rato cu mama?”
Diasabra 13 di mei, tiendanan den Caya Grandi ta haci bo bida
un poco mas facil dunando bo e idea perfecto pa regala mama
riba su dia. Lo tin musica, show di moda, cos di bebe y come,
sorpresanan pa tur mama y e mihor ta cu tiendanan ta habri te
7’or di anochi.

T’Aki Tin ta un iniciativa di Gobierno di Aruba cu, den coopera-
cion cu comerciantenan di Caya Betico Croes, ta crea actividad
na ocasionnan special pa aumenta e fluho di persona, e actividad
comercial den tiendanan y genera un ambiente mas atractivo den
nos centro di ciudad.
Pa Dia di Mama, T’Aki Tin a prepara diferente tent cu gift sets/
gift ideas pa mama, ‘Wine Tasting’ di Romar Trading y tambe
tasting di Sake.
Riba e mesun dia aki lo tin tambe ofertanan special na Dufry,
Aruba Aloe y for di artesanonan local cu a traha regalo special-
mente pa Dia di Mama.

Mas den e oranan di atardi lo tin un show di moda di Penha &
Lindy Lifestyle Boutique, caminda lo saca e ganador di e campaña
‘7 Days of Mother’s Day’.
Pa participa den e campaña ta facil. Pa cada compra di 50 florin
na un di e tiendanan participante, bo ta haya un ticket. E pre-
mionan ta, entre otro un Toaster Maker, Cena pa dos, estadia
na hotel y te hasta pasashi pa dos pa Orlando cu 500 dolar cash.
Ganador mester ta presenta pa ricibi su premio.

Pa loke ta trata ambiente y con pa deleita e stoma, por bisa cu
na Ricuras Café lo tin musica en bibo y prijsnan special, mientras
cu na Gelatissimo riba Plaza Daniel Leo, e prome 50 mama ta
haya un gelatto gratis.
E regalo pa tur e mama, wela y futuro mama t’e serenata en bibo
di dos galan di Aruba, esta Jeon y Roderick ‘Rocco’ Franken. Pa
keda na altura di tur cos, bishita e pagina di Facebook: T’Aki Tin.