Page 83 - KPA

Aruba sigur ta bay recupera di efectonan di oil spill

Monday, 29 May 2017 20:40
Comparti

Director Interino di Rampenbureau, Rino Hermans a duna di conoce cu sigur Aruba ta bay recupera di e efectonan
di e ‘oil spill’ cu a conoce e fin di siman tras di lomba.

No solamente tin tur elemento na luga pa realisa e trabounan di decontaminacion, pero tambe ta sigui di cerca e
desaroyonan. For di dialuna mainta trabounan di limpiesa a cuminsa riba e diferente boca di costa panort y ta
spera cu den termino di 1 pa 2 siman, tur trabou ta cla.
E funcionario di e oficina di calamidad ta admiti cu e trabou riba e barancanan lo tin mester di atencion adicional,
pero a sigura cu tur boca cu tin beach ta habri bek pa publico den termino corto. Tambe hunto cu Servicio
Meteorologico y coleganan na Boneiro ta mira con e situacion ta cana pa asina ta prepara pa cualke eventualidad
adicional. Ta keda hopi pendiente pa anticipa si acaso e stroom por cambia y e ‘oil spill’ ta yega na e beachnan
turistico na costa zuid pa por atende cu esey inmediatamente. E trabou ta continua y no lo caba tanten cu
Direccion di Naturalesa y Ambiente ta satisfecho.

Dialuna atardi Prome Minister Mike Eman a yama un conferencia di prensa extraordinario pa duna e ultimo
actualisacion di informacion. Aki el a cubri e diferente angulonan manera proteccion di trahadonan, test di e
material (pa conoce mas); pero tambe a gradici tur instancia y individuonan cu ta aportando na e causa.