Page 31 - HOH

E Raad van Bestuur ta responsabel pa locual ta pasando internamente den hospital. Entre
otro cu Laboratorio. Nan tabata sa, nan a wordo poni na altura, nan a wordo adverti, pero
no a actua. Tin mannan poni riba cabes di cierto hende. Como ABV, ta exigi y ta spera cu
por mira un investigacion profundo y externo y no interno, segun Gina Maduro.

Pa loke t’e sitio di Laboratorio, e ta haya cu e persona aki y esnan cu ta maneha e sistema
tecnologico, mester wordo manda cas pa por tin un bon investigacion y sin nan ta haya
chens di manipula cu e sistema. Pesey a pidi un reunion urgente cu Raad van Toezicht,
p’asina nan cuminsa cu e investigacion y duna e persona aki e prohibicion. Asina nan por
haci nan investigacion mihor y mas obhetivamente.

Tambe a tende di e rumornan cu tin cierto grupo di sector priva cu kier tuma Laboratorio
over. Segun Gina Maduro, Lab en principio tabata cay bao di Gobierno. Pero for di dos
aña pasa el a bira un fundacion nobo na unda cu e ta cay bao di hospital mes.

Hospital, esta e director, ta en realidad e responsabel, hunto cu Raad van Toezicht p’e
maneho completo di e laboratorio, unda cu nan tin un manager. Esey tabata e problema
tambe, pasobra e manager tabata kere cu ta Director y ta haci y deshaci. Y cu esey ABV
tabata tin problema.

E tabata un trayecto ora cu e overname a tuma lugar. E tempo ey ningun hende no kier a
tuma LAB, pasobra tabatin empleadonan cu tabata ambtenaar y ta hopi gasto. Ora cu a
bay over, tabatin un par cu a keda cu nan LMA, a scoge pa keda como ambtenaar.

Asina e fundacion a wordo funda, unda e ta cay bao di hospital unda e empleadonan a
drenta via e stichting.

Tin di compronde tambe cu si tin interesado di afo cu kier tuma e LAB over. E
trahadornan mes a sinti nan mes insigur, pasobra nan ta tende hopi rumor y directamente
di e teamleidernan indirecto ta cuminsa bisa nan cu nan ta di mas y tin di nan tin cu bay
cas.