Page 15 - MIN ON

OTMAR ODUBER (POR): “PUEBLO TA

SCLAMANDO PA UN MIHO CUIDO MEDICO

NA ARUBA”

May 10, 2017 adminarubanative Uncategorized Leave a comment

Cuido medico na Aruba mester atencion urgente, esey ta un secreto publico.
Casonan pa ilustra e siuacion aki tin asina hopi y cada un tin un importancia
grandi pa loke ta e desaroyo di nos comunidad, Otmar Oduber di POR ta duna di
conoce.

E ta indica cu tin un deficiencia grandi den varios sector di e cuido medico na nos
isla cu mester atencion urgente y nos pueblo ta sclamando pe. Tin falta di
specialistanan, tin un tempo di espera demasiado largo, tin biaha hasta casi 1
aña pa un pacient por logra wordo mira pa un specialista. Despues di esaki tin
biaha e persona ta wordo manda pa haci testnan y atrobe mester warda den
cierto casonan lunanan largo riba e resultado.

Esaki ta haci cu e pacient y su familiarnan ta desespera y ta dicidi di (ora tin e
medionan financiero) pa busca nan salud den exterior.

Di otro banda Oduber ta menciona e situacion di e dokternan cu a studia den e
region y cu no ta wordo permiti pa traha na Aruba. E ta considera esaki un
hilaridad mirando cu no solamente hopi sino ta tur di nan ta bay cu un
studielening di Aruba, cu porcierto a haya e ok di Departamento di Enseñansa y
ora nan regresa nan no mag di eherce nan profesion. Pero tambe mayoria di
pacient cu ta bay exterior via AZV ta bay hustamente e regionnan unda cu nos
estudiantenan di medicina a gradua.

Es decir, ta midi cu dos diferente midi y ta pushando nos hobennan medico pa
busca un futuro profesional leu di nan pais y ta perhudicando nos mesun
hendenan cu mester cana un caminda di cruz pa por haya e cuido medico cu nan
merece y tin mester di dje.

E lider politico ta menciona tambe e remedinan unda cu a bay over na kita hopi
di nan for di e lista di AZV mientras cu otronan a wordo cambia pa remedi
generico, cu riba su mes no ta generalmente malo, pero cual no tur hende ta bay
bon cu nan.