Page 69 - MEDIA MONITORING JULY 12, 2018

10
Djaweps 12 Yüli 2018
Felis dia
Bon kon a para ku Klein Kòrsou, òf esei tambe ta barié mand’é bou di tapeit? Mester tuma desishon shonnan, stòp di bira rondó. Tin muchu kos ku ta keda bira rondó sin tuma desishon anto asina un simpel piká di vruminga ta bira un kanser.
Kiko, mi shon no ta kere? Ban analisá un ratu: kuementu di tereno. Nunka no a atendé te ku el a bira un kanser. Outonan ku stürwil na man kontrali. No a atendé te ku el a bira un kanser. Kiko, mester sigui trese mas ehèmpel?
Ban pa algu paresido. Tin algun dia kaba ku tin diskushon ku si polis ta bai para tokamentu den Pietermaai. E kos ei ta lamentabel, pero laga nos komprondé otro bon. Si e establesimentunan a operá tur e tempu sin ku nan tin e pèrmitnan nesesario anto polis a hasi masha bon pa para e kos. Basta tempu a operá sin pèrmit, ke men ta ora pa regla kos. Outoridatnan a tarda demasiado mes.
Pero basta no ta otro
asuntu tin ei bou! Bosina
a skucha hendenan ta
papia ku e asuntu ku polis
ta menasá tokamentu
den Pietermaai ta
parse manera un kaso
kaminda hende ta tuma
posishon pa protehá
su grupo. E tokamentu
den Pietermaai ta pa
gran parti den man
di músikonan lokal.
Masha poko bia tin un
ekstranhero òf mas bien un yu di tera ku ta biba den eksterior. Ke men ta kiko por ta e problema? Un kos si ta bèrdat, ounke ku ta toka vários tipo di músika pero tòg no ta tur tipo di músika ta topa den establesimentunan den Pietermaai. Feco, kiko mi shon por splika di e kos ei?
Zonifikashon, mi tata dushi. Shonnan ta kòrda ku asta un gobièrnu a kai pa e kos ei? Anto te awe muchu hende no sa mes kiko ta zonafikashon. Den tur esei, Bosina a skucha bon? Ta bèrdat ku ta bai studia e rotònde nobo na Sta. Rosa? Nos tin komprenshon ku a tarda bastante promé ku a yega na e pensamentu ei. E pensamentu so ku mester bai studia e asuntu ta pone ku sierto hendenan lo sinti un doló inmenso te den nan kurason, ounke mas bien e doló ta den nan honor. Di tur manera ta di aploudí ku a habri mente pa bai studia e asuntu.
Ta hopi reklamo tin di e rotònde ei. E reklamo ta despues ku a hasi e komparashon ku rotòndenan na Janwe, Zuikertuintje i otronan. Ku otro palabra no ta asina ku shofùrnan a habri boka reklamá sin ku nan tin material di komparashon. Rotònde a yuda situashon di tráfiko na Janwe, ku tur hende ku ta hasi uso di e kaminda ei a bendishoná esun òf esnan ku a diseñá i traha e rotònde na Janwe. Di otro banda esun na Sta. Rosa for di e promé dia a resultá un doló di kabes, pa nos usa palabranan nèchi. E historia ku mester a laga lugá pa mas hende kana na pia ta bunita bisá, pensamentu di hende prèt. Un aspekto so, e solo kayente ku nos konosé na Kòrsou no ta duna niun hende smak pa sali ni un ratu na pia. No papia mes di otro aspektonan.
Te mas ratu redactie@extra.cw
WILLEMSTAD.- Ulanda tin ku traha mas duru pa salbaguardiá derechonan humano na Kòrsou, Aruba, Sint Maarten, Boneiru, Sint Eustatius i Saba. Nan mester ta na mesun nivel ku na Ulanda. Asina ‘Adviesraad InternationaleVraagstukken (AIV)’ a konkluí den un rapòrt. Segun AIV, Ulanda i e seis islanan ta forma parti di e mesun Reino Ulandes. Abitantenan di Ulanda i e seis islanan por konta ku nan tin e mesun derecho humano. Pero den realidat esaki no ta kuadra. Ora Ulanda ta firma un akuerdo tokante derechonan humano mayoria bia e ta konta pa Ulanda so, segun AIV.
E tres otro pais den Reino, Kòrsou, Aruba i Sint Maarten, meskos ku e tres munisipio ekstraordinario
Boneiru, Sint Eustatius i Saba, tin ku tuma diferente medidanan promé ku e akuerdo por konta pa nan tambe. Hopi bia e diferente gobièrnunan no ta tuma e diferente medidanan pa falta di tempu òf prioridat. Komo konsekuensia riba tereno di derecho humano den Reino Ulandes ta reina dos diferente situashon. Un pais ku a regla tur kos korekto riba tereno di derecho humano pa su abitantenan, i un otro parti di Reino ku no tin e mesun derechinan.
AIV ta un organisashon importante na Ulanda ku ta duna konseho na gobièrnu i Parlamento.
Komo konseho AIV ta bisa ku Ulanda tin ku traha mas serka ku e tres islanan Boneiru, Sint Eustatius i Saba riba e tereno ei. Pa
motibu ku Ulanda tin un responsabilidat grandi pa e tres islanan spesífiko. Pero den general nan tin un responsabilidat pa henter Reino.
Segun AIV den futuro si Ulanda ta firma un akuerdo riba tereno i derecho humano, Ulanda tin ku traha un plan kon por sòru ku e akuerdo por konta pa e otro islanan tambe. Na e momentu aki tin seis tratado importante, entre otro tokante hende desabilitá, ku te ainda ta konta pa Ulanda so.
AIV a splika den su rapòrt ku esaki tin komo konsekuensia ku Reino Ulandes a wòrdu informá resientemente ku nan tin ku drecha e situashon. Si no nan por haña un sanshon for di Nashonnan Uní.
Segun rapòrt AIV
‘Situashon di derecho humano no ta balansá den Reino Ulandes’
Eks-gezaghebber Stanley Betrian
Mester bin ku un funshonario haltu pa atendé asuntunan di kontròl i pèrmit
WILLEMSTAD.- Eks- gezaghebber ta boga pa un funshonario so ta enkargá ku aspektonan di pèrmit i kontròl en general. Mester ta algu meskos ku den pasado Gezaghebber komo un funshonario responsabel tabata karga. E situashon aktual kaminda pida di kada kontròl ta kai bou di diferente ministerio no ta un situashon saludabel, asina Betrian ta bisa a rais den e situashon ku a surgi den Nieuwestraat.
Manera EXTRA a informá, e desishon di outoridatnan pa para músika bibu den e área aki a generá un debate serio. Habitantenan no ta aseptá mas ku nan plaser di biba den un ambiente sano ta afektá pa tokamentu duru i molèster en general. Algun di nan a splika e siman aki ku tin biaha nan no por yega nan kas ku nan outo siendo ku e kaya ta unu ku mester ta habrí pa tráfiko. Di otro banda Nieuwestraat huntu ku otro kayanan den e área a bira un sentro nokturno di hopi ambiente i ta halando dia pa dia mas hende. Tin preokupashon ku e situashon aki por bai pèrdí i por afektá turismo en general. E habitantenan a indiká ku nan kier mira un solushon kaminda tur hende
ta gana. Un di e aspektonan importante den e kaso aki ta unda e responsabilidat pa tuma akshon ta. Den kontròlnan ku ta tumando lugá rònt Kòrsou un tim multidisiplinario ta hasiendo e trabou. E tim tin den dje funshonarionan ku ta kai bou di responsabilidat di Ministerio di Hustisia, Ministerio di Ekonomia, Ministerio di Salú, Ministerio di SOAW i Ministerio di Finansa (Duana). Esei ta krea un konfushon enorme. Ta p’esei Betrian ta kere ku un persona ku un tarea spesífiko pa tur e áreanan aki lo yuda e situashon. “Yam’é un alkalde, yam’é kiko ku ta pero e situashon ku tin awor aki kaminda tur e tareanan ta partí entre diferente Ministerio for di 2010 no ta kumbiní. Den pasado tabatin un Gezaghebber ku tabata akapará tur e aspektonan aki. Un persona so ta e punto di referensia ora e kasonan aki presentá”, segun Betrian a bisa. Kon mester bai hinka e asuntu aki den otro ta algu ku mester diskutí. E forma mester papia riba dje, asina Betrian ta bisa.
Betrian no ta promé eks- mandatario òf mandatario den funshon ku ta kuestioná e situashon aktual kaminda e tareanan ta plamá awor
aki. Den pasado minister di hustisia di e tempu ei Nelson Navarro a boga pa un sekretario di estado pa hustisia konsiderando e mas ku 30 institutonan ku ta kai bou di e Ministerio di Hustisia. Na manera di mira di Navarro e tempu ei un funshonario pa atendé aspektonan polisial, entre otro pèrmitnan, sigur mester ta algu pa konsiderá. Nunka a duna oido na su petishon. Awor aki e mesun situashon ta presentá ku por tin konsekuensianan serio. Diferente minister a sali riba e situashon e siman aki, konfirmando ku no tin punto di bista fiho kon atendé e situashon.
Awor ku Betrian a presentá e sugerensia, lo mester bai wak si tin sosten polítiko pa un idea asina aki. Bèrdat ta ku polítiko i mandatarionan no ta gusta saka tareanan ku nan tin pa duna otro hende, asina analistanan ta bisa. Esei ta e motibu primordial tambe ku te awe no tin kambio a tuma lugá. E kaso Nieuwestraat sinembargo a demostrá un biaha mas ku no por sigui ku e situashon fragmentá aki kaminda ta kreando konfushon so i e niun hende sa unda e responsabilidat konkreto ta.