Page 39 - Travail L'Oscar èt l'Alfred-etude-de-Louis-Mores

— Martial, v’atez in sacré farceur! Mâs v’atez in houmme bin, in
houmme dè cœur, èt djè n’règrette mi d’avoir bin v’lu v’nu tchûz
vous!

— Là d’sus, ma bounne Adèle, on va pouvoir mîdgi. Dj’espère
què vès n’m’a v’léz-m’ dè trop...

— Martial, j’ai toujours été une fille de paysan. Vous avez fait de
moi une femme de notaire. Mâs djè sû bin binâje dè dècouvri in vrai
Gaumais, in houmme qu’èst capâbe dè réver d’aut’ chose què
d’liards èt d’pension. Dj’alans nous règaler, c’t’heure...

* * * * * *
L’Adèle è coummaci pa des asepèrdges qui bagnint da n’sauce
in pau èpaisse, in pau djaune, aveu des us dècharpatés qu’on
n’voyout pus què l’jaune et don persin tapé pa d’zu. Èl Drolle è
r’wâti ça aveu n’mine qui n’lâyout pont d’doute : ça n’dèvout-m’ ète
bon, ces affaires-là. I s’dèmandout bin d’qué bîte qu’elles vènint ces
cawes-là èt i fayout l’dègouté.

La Fifine èl rèwâtout t’a chignant. Elle sè d’mandout si l’Oscar
allout poser la question ou si i l’allout dère qu’i n’avout’m fî.

L’Adèle, qui n’è-m’ tchue d’la dârinte plauve, attaque :

— Tè n’îme mi ça, m’pètit, ou bin tè n’sais c’què c’est?

— Djè n’a n’â jamâs vû, ni mîdgi! Tchûz nous, on n’èst-m’
ritches, mâs on n’mîdge djamâs la cawe des bîtes, co moins celle
des rats ou des souris...

– 39 –