Page 35 - Travail L'Oscar èt l'Alfred-etude-de-Louis-Mores

ANNEXE 3 : Extraits du roman analysés

au cours du travail

Extrait A (en rouge)

Èl Drolle è tchû don tchî ...

Èl gamin don Djoseuf avout tchû en bas don tomberau. On
n’arout sû dère s’i s’avout broyi n’patte ou s’i breûlout télmat qu’i-l
avout eû la troûille. Ès frère l’avout moûné das la grîdge èt l’avout
ètadu das l’fon, paç’què ça fayout coume in mat’las. Co d’in pô qu’i
l’arout mins à plat su l’ratî ...

La mère n’avout rin vû, mâs coumme elle padout la châwâye
das l’méche, elle avout oyi s’gamin qui brâyout, pa la dgerb’resse
qu’atout toudjou grande au lârge, oï qu’i n’avint jamâs pont mins
d’cârreau à la f’nîte.

— Què c’què v’ez co fât, varas d’jeunes ?

— C’est rin, Man! L’Oscar è vû eune grosse aragne èt i-l è eû la
pète dè sa vie.

— Ça, c’est n’mente, Gabriel! Djè sais bin qu’ l’Oscar n’è djamâs
eû peur des aragnes : c’est lu qui lès tchesse das la mâjon. I n’faut-m’
m’a raconter! Què-ce qui gn’ è co eû? Pouquoi c’qui breûle
coumme in pouchî qu’on s’rout en train d’dèpayoti?

— Ça va aller, Man, i-l è tchû don tombereau èt djè crois qu’i s’è
tordu in paû la patte.

— Vès n’a fayez pont d’aute, mille djeux. Rawardez, djè vins voir.

GEOFFROY, Jean-Luc, L'Oscar èt l'Alfred à l'icole, roman, Musée de la
Parole en Ardenne, Marche-en-Famenne, 2013, p.9.

– 35 –