Page 3 - Serat Wulangreh Pupuh Gambuh_Neat
P. 3
Gambuh
Kapethik sekang Serat Wulangreh dening PB IV
Pada I
Sekar gambuh ping catur
Kang cinatur polah kang kalantur
Tanpa tutur katula-tula katali
Kadaluwarsa katutuh
Kapatuh pan dadi awon
Terjemah basa Banyumasan:
Tembang gambuh sing ping papat, sing dirembug yakuwe tindak-tanduk sing
kebanjur ora nganggo aturan, ora gelem ngrungokna pitutur utawa nasehat, suwe-
suwe ora bisa dikendhaleni lan akibate banget ora apike, dadi ala pisan.
Pada 2
Aja nganti kebanjur
Barang polah ingkang nora jujur
Yen kebanjur seyekti kojur tan becik
Becik ngupayaa iku
Pitutur ingkang sayektos
Terjemah basa Banyumasan:
Aja nganti kowe kebanjur tumindak sing ora jujur, merga nek wi kebanjur bakale
merekna cilaka, lan kuwe ora apik, mulane ayuh nggoleta piwulang sing sejati.
Pada 3
Tutur bener puniku
Seyektine apantes tiniru
Nadyan metu saking wong sudra papeki
Lamun becik anggone muruk
Iku pantes siro anggo
Terjemah basa Banyumasan:
Piwulang sing bener kuwe pantes ditiru, senajan asale sekang wong sing asor drajate,
nek bener golih mulang, kuwe ya patut ditampa.
Pada 4
Ana pocapanipun
Adiguna adigang adigung
Pan adigang kidang adigung pan esthi
Adiguna ula iku
Telu pisan mati sempyoh
Terjemah basa Banyumasan:
Ana unen-unen paribasan adiguna, adigung, adigang. Adigang ibarate kidang,
adigung ibarate gajah, lan adiguna ibarate ula. Telu-telune mati bareng.
