Page 5 - Serat Wulangreh Pupuh Gambuh_Neat
P. 5
Gambuh
Kapethik sekang Serat Wulangreh dening PB IV
Pada 9
Ing wong urip puniku
Aja nganggo ambek kang tetelu
Anganggowa rereh ririh ngati-ati
Den kewangwang barang laku
Kang waskitha solahing wong
Terjemah basa Banyumas
Sajroning urip nang ngalam donya, aja nggedhek-nggedhekna watek telu cacahe
mau. Tumindaka kanthi watek sabar, sareh ngati-ati.gatekna kabeh tindak-tanduk, lan
siyaga waskitha kabeh tingkah polah wong liya.
Pada 10
Dene tetelu iku
Si kidang suka ing patinipun
Pan si gajah alena patinireki
Si ula ing patinipun
Ngandelaken upase mandos
Terjemah basa Banyumas
Sekang telung pepindhan kuwe, si kidang mati merga seneng-senenge, gajah mati
merga teledhore, dene ula mati merga mandine upase utawa racune.
Pada 11
Tetelu nora patut
Yen tiniru mapan dadi luput
Titikane wong anom kurang wewadi
Bungah akeh wong nggunggung
Wekasane kajalomprong
Terjemah basa Banyumasan
Kowe ora patut nek niru bab telu-telune mau, nek kowe neniru telu kuwe mau bakale
dadi ora becik. Tandha-tandhane wong enom sing ora ngerti rahasiane urip, yakuwe
rasa seneng nek akeh sing ngalem-alem sing akhire malah njorogna maring bab sing
ora maen.
Pada 12
Yen wong anom iku
Kakehen panggunggung dadi kumprung
Pengung bingung wekasane pan angoling
Yen ginunggung muncu-muncu
Kaya wudun meh mencothot
Terjemah basa Banyumasan
Nek wong enom kakehen sing ngalem-alem palah dadi lengob, budheg lan bingung,
gampang diontang-antingna, gampang dipengaruhi, nek agi dialem-alem mecucu
kaya wudun sing wis arep pecah.
