Page 6 - Serat Wulangreh Pupuh Gambuh_Neat
P. 6
Gambuh
Kapethik sekang Serat Wulangreh dening PB IV
Pada 13
Dene kang padha nggunggung
Pan sepele iku pamrihipun
Mung warege wadhuk kalimising lathi
Lan telese gondhangipun
Reruba alaning uwong
Terjemah basa Banyumasan
Lan maning sing padha ngalem-alem, kepengine mung prasaja pisan, yakuwe wareg
wetenge, klimis lambene, lan teles tenggorokane, yakuwe wareg ing bab mangan lan
ngombe sing enak, ningen kanthi ngedol alaning wong liya.
Pada 14
Amrih pareke iku
Yen wus kanggep nuli gawe umuk
Pan wong akeh sayektine padha wedi
Tan wurung tanpa pisungsung
Adol snaggup sakehing wong
Terjemah basa banyumasan
Merga supaya pereke karo ndhuwurane (atasane) karo bose kuwe mau, nek wis
rumangsa dipercaya, rumangsa dikanggokna banjur gawe omongan dilewih-lewihna,
supaya wong-wong liya kon padha wedi, mulane dadi bisa nampa punjungan utawa
upeti senajan sekang golih adol kabisane wong akeh, ya kabisane wong liya, dudu
kabisane dhewek.
Padha 15
Yen wong mangkono iku
Nora pantes cedhak lan wong agung
Nora wurung anuntun panggawe juti
Nanging ana pantesipun
Wong mangkono didhedheplok
Terjemah basa Banyumasan
Wong sing wateke kaya kuwe ora pantes pedhek karo wong panggedhe, para
pemimpin, merga wong sing wateke kaya kuwe bisa merekna dadi penyengkuyunge
tumindak jahat, wong sing wateke kaya kuwe ora ana patute dikapakna, kejaba
pantese dibebek.
Pada 16
Aja kakehen sanggup
Durung weruh tuture agupruk
Tutur nempil panganggepe wruh pribadi
Pangrasane keh kang nggunggung
Kang wus weruh amalengos
Terjemah basa Banyumasan
Dadi wong aja kakehen kesanggupan, rumangsa apa-apa ngerti apa-apa bisa, durung
weruh dhewek gulih ngomong gupruk kaya weruh-weruha, malah mung krungu thok
nganggepe kaya wis weruh dhewek. Rumangsane akeh sing ngalem-alem, padhahal
sing wis ngerti sejatine mlengos.
