Page 45 - Min.TTC_Neat

Delta Airlines cu confianza grandi den Aruba

Publication: Tuesday, 28 April 2015. Categoria: General
Mientras ta cortando den vuelonan ‘long haul’ Aruba ta
mantene su vuelonan

ORANJESTAD (AAN):
Delta Airlines a mustra su confianza
grandi den Aruba. Durante e encuentro cu Minister Otmar Oduber tabatin cu e
compania aereo diabierna pasa, Delta a mustra cu ta mantene nan vuelonan pa nos
isla, esaki a pesar cu nan ta cortando vuelonan asina yama ‘long haul’.
Delta Airlines ta un aerolinea importante pa loke ta mercadeo Mericano y a sa di mustra su
confianza den nos isla durante ultimo añanan.
Durante e reunion cu Minister Otmar Oduber tabatin siman pasa cu e
ehecutivonan di e aerolinea, por a wak un biaha mas e confianza aki na momento
cu a anuncia, cu contrario na otro vuelonan ‘long haul’ cu nan frecuencia lo
worde reduci, Aruba lo mantene su vuelonan manera nan ta na e momentonan aki.
Den e cuadro aki mester bisa cu Delta ta haya aproximandamente 30% di su
ganashi for di vuelonan internacional, incluyendo nos isla cu a mantene e
cantidad di vuelonan.
Durante e reunion a papia riba diferente aspecto, pero en
general por bisa cu loke ta resalta ta e confianza cu tin den Aruba como
producto turistico.
Minister Otmar Oduber a indica cu e satisfaccion mas grandi
ta pa scucha e forma con e aerolineanan ta expresa nan mes riba Aruba, riba nos
aeropuerto, riba e stabilidad, e turismo y e futuro cu nan ta mira pa nos isla
no solmente turisticamente, pero tambe riba e funcion di hub cu kier crea pa
Aruba.