Page 52 - Min.TTC_Neat

United Airlines lo aumenta su frecuencia di vuelonan di uno pa cinco pa siman
durante e zomer aki for di Houston

 Apr 28th, 2015
 Local

Durante reunion cu Minister Otmar Oduber tabata tin diabierna mainta cu United Airlines na
Merca, e noticia positivo a bin dilanti cu nan lo aumenta nan vuelonan di uno pa cinco biaha pa
siman durante e zomer aki for di Houston. Minister Oduber a indica cu mientras cu den Caribe ta
premirando un crecemento di aproximadamente 3 porciento den cantidad di stoelnan, na Aruba
nos a logra supera e porcentahe aki na un aumento di 14 porciento durante e zomer aki.
Papiando di United Airlines, e mandatario a indica cu 3 aña pasa no tabata conta cu e vuelonan
aki. Na 2013-2014 a cuminza cu algun vuelo incidental den temporada halto, pero a base di e
confianza grandi cu tin den e mercado turistico di Aruba, na december aña pasa United a dicidi
di pone vuelonan frecuente. Nan a cuminsa bula tur diasabra mescos cu Southwest Airlines, for
di Houston pa 2015, pero awor nan a anuncia 4 vuelo adicional, bulando tur dia cu excepcion di
diamars y diahuebs durante e periodo di juni te cu augustus. Despues di esaki lo sigui negocia e
vuelonan adicional, cual ta mustra un confianza hopi grandi. Mas aleu Minister di Turismo a
duna di conoce cu pa e temporada aki lo bay conoce un aumento di 12 porciento den cantidad di
stoel for di Merca, Canada lo tin un aumento di 3 porciento, Latino America (di cual Venezuela
tin un rol importante) lo conoce un aumento di 18 porciento y esaki ta significa un total di 112
mil stoel adicional cu lo bay mira pa nos isla. Pa e mandatario, e aumentonan aki ta habri
posibilidad nan hopi grandi pa nos isla y ta demostra e confianza grandi pa nos isla.
E mandatario a gradici tur e partnernan cu a contribui na e logro aki manera ta AAA, ATA y
AHATA, mientras cu el a felicita comunidad di Aruba en general.