Page 33 - ATA

Serlimar ta acusa Ecotech di tiramento di sushi ilegalmente
den bario di Moko

Thursday, 14 April 2016 12:36
Comparti

"Cu disgusto por a tuma nota di un desaroyo hopi tristo unda un compania priva claramente ta tira sushi
ilegalmente riba un sero di desperdicio den bario di Moko", asina Nathalie Wolff di Serlimar ta duna di
conoce den un comunicado di Serlimar.

Mirando e cantidad di sushi, ta indica cu esaki ta andando pa algun tempo caba. Serlimar ta condena e
acto aki unda companianan priva ta engaña nan clientenan di recicla, pero al contrario ta tira esaki na
Moko. Acto tin consecuencia grave pa nos turismo, finanzas publico y medio ambiente E caso aki sigur
tin consequencia grave pa e pilar di nos economia, turismo, nos medio ambiente y e higiena general di
nos pais. Tambe e ta un falta di respet pa varios instancia di gobierno cu diariamente ta lucha pa
mantene e limpiesa general di nos isla. Instancianan di Gobierno, manera e.o. Gele Koorts en
Muskietenbestrijding, Volksgezondsheid, Dienst Besmettelijke Ziektes y Serlimar, tur ta inverti pa aña
hopi placa y tempo pa combati Zika, Chikunguya y Dengue.

Y netamente un compania cu ta propaga di si ta recicla, ta bin haci e tipo di actonan aki contra nos pais.
Como e compania apunta pa ley den coleccion di desperdicio di Aruba, ta un cantidad grandi di trabao di
limpiesa publico Serlimar ta encarga cu ne diariamente. Hopi di e accionnan aki di limpiesa, ta Serlimar
ta ehecuta y na varios occasion ta financia tambe. Pues tin hopi caso unda cu no sa ken ta tira e sushi. Di
experiencia aki trata di gastonan grandi. Ta inacceptabel cu di otro banda, otro companianan priva ta bin
contribui na mas dump ilegal riba nos isla. Ta keda awor na autoridadnan concerni pa asumi nan
responsabilidad y tuma pasonan legal manera describi den e Ley di Medio Ambiente y e Algemene Politie
Verordening.

Tambe por mira e potretnan adhunto unda cu e compania ta “op heterdaad betrapt” haciendo e delito, cu
ta prueba solido pa e caso aki. Pa Ley, e compania of persona responsabel pa contaminacion di e lugar, ta
alaves responsabel pa carga e gastonan pa lanta e desperdicio aki atrobe y deposita esaki na Landfill
Parkietenbos, cual ta e unico sitio legal na Aruba pa deposita desperdicio. Serlimar tin tur confiansa cu
autoridadnan lo atende cu e caso aki debidamente.