Page 5 - AWM 4APRIL,2016

AWEMainta Dialuna, 04 April 2016 5

Manera publica diasabra ultimo

CITGO ta
cuminsa paga
‘Lease’ na
Pais Aruba
inmediatamente
despues di firma
acuerdo

FOR di momento cu CITGO firma e acuerdo final

cu Pais Aruba, nan lo cuminsa paga e suma anual pa
Lease.
“E acuerdo cu tin riba mesa ta for di ‘Day One’,”
asina Minister ing. Mike de Meza a duna di conoce.
Esaki tabata contesta na pregunta lansa pa miembro
di prensa durante un conferencia di prensa cu e
mandatario a yama diahuebs atardi.

CITGO lo paga loke proporcionalmente mester pa
cumpli cu ne pa aña 2016 cumpliendo asina cu e
obligacion cu tin cu Pais Aruba como propietario di e
tereno industrial caminda refineria ta ubica.

Manera a keda anuncia den e conferencia di prensa
extraordinario dor di Minister di Asunto Economico,
Comunicacion, Energia y Medio Ambiente, ing. Mike
de Meza diahuebs atardi, e fase di negociacion actual
pa cu reapertura di refineria a keda extendi cu 6 siman.

Tur tres partido, esta Gobierno di Aruba, CITGO y
Valero a bay di acuerdo cu esaki pa responsablemente
pasa riba tur e detayenan tecnico y legal cu un acuerdo
di e magnitud aki ta ensera.

E delegacionnan ta trahando hopi duro reuniendo
na Houston, Miami y Aruba pa pasa riba delaster un
detaye, pero asina mes, tin mas pa hopi trabou ainda.
Un bes cu e fase aki ta tras di lomba y acuerdo ta
firma, ta inicia e periodo caminda CITGO ta haci
inversionnan cuantioso pa pone e refineria den
condicion pa produci nan obhetivo cu ta riba 200 mil
bari. Esaki ta un proceso cu ta bay tuma rond di 3 aña.

Apesar di esey, e compania petrolero ta mara den e
contract pa cuminsa paga huur (lease) di e tereno for
di momento cu firma e acuerdo dia 13 di mei proximo.
Fuera cu caha di Gobierno ta cuminsa ricibi entrada
inmediatamente, e proceso di rehabilitacion riba su
mes tambe ta genera un cantidad grandi di cupo di
trabou cu ta beneficia nos economia adicionalmente.