Page 22 - KPA JAN 19

Hof a mustra cu na dado momento na e bar, tabatin un otro persona cu a yuda e victima bay auto
pasobra e tabata burachi. Segun e persona, e dos hombernan tabata grita si mester ayudo. Na
dado momento victima cay dal cabez. C. y D. a bisa Hof cu e momento ey nan tabata cana bay
pa nan auto y a mira kico tabata pasando cu e victima y nan a bay yuda. Nan a pone e victima
ariba e asiento di patras den e pick up cu intension pa hib’e cas di e persona cu tabata yud’e.

Hof a puntra si nan por tabata sa si e victima a wordo droga. Hof ta referi aki na e hecho si lo por
a tira cos den e bebida di e victima. E dos acusadonan a bisa cu nan no sa y nan ta haya cu e
victima tabata bebi y cu e victima a bisa cu e kier djis sosega un rato.

Nan a bisa Hof cu nan no a grita manera testigo lo a bisa. Hof a mustra cu segun un testigo, nan
lo mester a sigui e persona G. pa bay su cas pero nan a core bay lag’e. C. y D. a bisa cu no ta
asina. Segun D., e conoce G. y tabata sa unda e ta biba.

Hof a bisa cu tin otro persona P. cu a bisa cu ariba beach na Eagle banda di Costa Linda, banda
di 6’or di mainta, el a mira e pick up para cu e dos sospechosonan y e victima y cu nan tabatin
relacion.

Den sala di Corte ayera C. y D. a bisa Hof cu nan tabatin relacion cu e victima pero cu esey
tabata a base voluntario. Nan a bisa cu na dado momento e victima a recobra conocimento y a
bisa cu e kier sigui trip y na dado momento nan a haci sex, te na momento cu e homber P. a
presenta.

Hof a mustra cu e persona P. a bisa cu el a mira pick up move y scucha un muher bisa no no no.
Segun D. el a bisa cu e victima cu tin un persona tabata biniendo y si kier pa e otro persona bin
join y e momento ey e victima a bisa no, no y no.

Segun C., e persona P. a acera e pick up y kier haya un bebida y kier a join den e tenemento di
relacion sexual. E ora ey el a bis’e pa move.

Segun Hof, P. a bisa cu e muher tabata drumi riba barica sunu. El a mira nan core bay den pick
up y P. a sigui nan tras y na dado momento un di nan a mustr’e e dede mahos. Segun C. door cu
un hende a grita core ca…, el a mustra dede mahos. El a bisa Hof cu e no tabata sa e momento ey
cu ta P. Ta despues el a ripara cu ta P.

Hof a puntra C. pakico a laga e victima benta abou y sin paña. Segun C. a purba bisti e victima
su shimis pero no a logra. E ora ey a corta e shimis y tap’e manera un sarbeta. E motibo cu a haci
esaki, ta pasobra a mira e victima perde conocemento ora nan tabata haciendo sex cun’e. A mishi
cun’e pero e no tabata reaccciona. Nan a bira panico y a kere cu el a muri. Nan a spanta y pesey a
lag’e atras asina banda lugar di Tennis. Segun C. e homber P. na dado momento a sera nan y
baha cu intension pa bringa. El a reverse pick up y core bay.

Hof a mustra cu mas o menos 7’or di mainta, un persona a haya e victima drumi asina y a
notifica Polis.