Page 18 - KPA JAN 19

Autoridad a intercepta dropping fracasa di droga teni den
dia cla

Publication: Tuesday, 19 January 2016. Categoria: Policial
Asina a intercepta casi 400 kilo di droga na cabez di Aruba

ORANJESTAD (AAN): Tabata Dialuna den careda di 10’or di mainta, cu autoridad a haya
informacion valioso, di un boto sospechoso biniendo for di zuid y ta drentando teritorio local,
den area di cabez di Aruba.
Di biaha a manda unidad di Polis cu auto na punta di Aruba, pa asina vigila tur cos di leu. Y
mesora tambe Polis Maritimo, unidad BP-2 pa subi lama bay den direccion pariba. E bon ta cu e
Boto potente di Polis a logra yega basta liher pariba y yegando cabes di Aruba na Punta Basora a
tuma nota di leu, con tin dos boto chikito sospechoso ta moviendo algun meter leu for di otro,
bayendo direccion panort.
For di leu, cu binocular potente, a sigui vigila e botonan for di un distancia y aki e oficialnan riba
e boto Maritimo a mira claramente con e dropping a tuma luga riba lama, y den dia cla.
A capta ora cu un di dos boto a yega cerca, y e dropping a tuma luga. Polis a dicidi move riba
nan, pasa piki e bultonan y di biaha a bay den direccion di e boto cu a drop, y ta trata aki di e
boto “Porfin”.
Posteriormente a bay na e di dos boto cu a piki y realisa detencion ora a haya bultonan.
E operativo aki a bay completamente pa e Polisnan maritimo cu a detene e dos hombernan local,
y riba tera tabatin patruya cu a mira tur cos y raporta esaki na e Polisnan riba lama.