Page 10 - MIN TTC 13 APRIL 2016

Mayoria turista ta busca e producto autentico di Aruba

Tuesday, 12 April 2016 18:55
Comparti

Den e prome sesion cu un varios entidad den nos comunidad cu enfoke special riba nos turismo, APA
tabata bon representa cu su director Sr. Jossy Figaroa.

Segun Sr. Figaroa tipo di iniciativanan asina ta hopi bon specialmente pa nos sector turistico. Ta
importante pa keda monitor e desaroyo cu tin, mirando cu tin hopi tendencianan laga pasa, pero cu tin
su efectonan grandi pa un isla cu ta depende completamente riba turismo. Gobierno y ATA ta reconoce e
puntonan esencial na tempo pa sigui desaroya e sector aki. Aruba mester por duna mas di nos mes, e
director ta comenta. Un di e situacionnan cu ta hala atencion segun Sr. Figaroa ta cu na momento cu un
turista yega Aruba e tin un perspectiva halto, cu Aruba ta un destinacion den un categoria hopi halto, y
pa Aruba por cumpli cu esaki nos mester por percura pa e turista haya e calidad ey tambe. Asina cu un
turista ta haya un trato normal, esaki ya caba no ta cuadra cu e perspectiva cu e ta yega cu ne. E director
di APA ta sigui comenta cu ta pesey mes cada Arubiano cu ta biba riba e pida baranca aki y cu stima
Aruba mester por duna e miho cu nos. E reunion cu tur e stakeholders y Minister di Turismo ta
netamente pa trece tur e puntonan aki di preocupacion y cu ta di suma importancia pa sigui hisa e
calidad di servicio cu nos ta duna na cada turista cu ta yega cerca nos. "Ta hunto so nos por logra pa ta
mas consciente y haci locual cu ta necesario pa trece e cambionan cu nos mester haci pa mantene Aruba
top como destinacion." Mester pone atencion riba e servicio cu nos ta duna na tur turista manera antes
nos tabata haci esaki. "Duna servicio no kiermen solamente e taxinan so of e tour operators of na hotel e
waiter of esun cu ta haci camber limpi, pero e ta concerni nos tur. Tur cu ta biba riba e pida baranca aki y
cu tambe ta haci uzo di diferente actividadnan rond di nos isla, sigur lo topa mas cu un turista y aki
tambe mester por duna di nan propio parti pa trata e turista cu mas identidad Arubano. No por trata e
turista na un manera bruto. Duna e miho di nos pa e turista sinti su mes bon y cu Aruba por keda un
destinacion cu lo e kier bin bek door di e amabilidad di su hendenan." Sr. Figaroa ta sigui comenta: "
Cada un di nos mester corda cu Aruba ta un destinacion hopi gusta y e meta ta pa sigui mantene asina."
Un otro punto cu tambe a destaca ta cu Aruba mester por ofrece un producto autentico.E director di APA
ta reconoce e maneho di Minister Oduber cu ta enfoca riba e punto aki tambe. E combinacion di Turismo
cu Cultura awor sigur ta haya mas peso. Director di APA a duna di conoce cu turistanan di barco hopi
biaha ta busca produccion local. "Nan ta puntra pa cualkier tipo di producto contal cu e ta netamente di
Aruba. Y esaki ta caminda cu nos mester por ofrece." Den e reunion a keda palabra cu cada un di e
instancianan cu tabata presente lo mester bay den nan mes un seno bek, papia cu nan personal hiba e
mensahe, y tuma anotacion di e feedback cu a ricibi pa asina aki dos siman lo por sigui elabora. Intencion
ta tambe pa analisa kico ta e pasonan cu mester tuma pa mehoracion di nos Producto. Director di APA ta
entusiasma pa forma parti di e plataforma pa asina hunto traha riba tur e puntonan.

http://www.24ora.com/local-mainmenu-5/107476-mayoria-turista-ta-busca-e-producto-autentico-di-
aruba