Page 14 - MIN TTC 13 APRIL 2016

Un di e meta nan di ATA ta pa subi ingreso economico di turismo pa Aruba

Tuesday, 12 April 2016 18:46
Comparti

Minister Otmar Oduber a tuma como iniciativa pa a sinta na mesa cu diferente
stakeholders cu di un of otro forma tin di haber cu turismo di Aruba. Hunto cu ATA a comparti informacion valido
pa yega na un meta comun cual ta logra cu e turista ta gasta mas riba nos isla.
Aruba semper a enfoca riba turista di calidad. Directora di Aruba Tourism Authority (ATA) Sra. Ronella Tijn Asjoe -
Croes ta indica cu dialogo semper ta importante specificamente na momento cu ta trata di un topico asina
sensitivo y importante pa direccion di escogencia di turista cu nos kier na Aruba. Un di e meta nan di ATA ta pa
subi ingreso pa medio di turismo pa Aruba. Sinembargo tin diferente tendencia cu ta pone cu Aruba mester ta
mas alerta cu normal. Actualmente ATA tin su actividadnan cu ta parti den e planificacion di presupuesto di
Aruba, pero na mes momento tin proyectonan nobo y inovativo pa sigui engrandece nos sector turistico. Director
di ATA Sra. Ronella Tijn Asjoe-Croes ta contento cu Minister Oduber a crea e plataforma cu por sinta na mesa cu e
diferente stakeholders, entre otro A.T.A., Centrale Bank van Aruba, Camara di Comercio, restaurantnan, ATIA,
A.H.A.T.A., San Nicolas Business Association, ATSA, A.P.A. y Aruba Luxury Retail Association. Ta importante pa ATA
ta na altura di e pensamento y kico ta biba entre e entidadnan aki. Tin hopi punto cu a bin dilanti,entre otro cu
mester un poco di aliniacion riba kico ta e factornan cu ta hiba cu e turista ta frena ora di gasta. ATA mes a
presenta hopi di loke cu e bishitantenan ta bisa di Aruba, pero kisas lo por haci un poco mas di investigacion pa
asina sa un poco mas detaye specifico di e tendencia aki. E presentacion di ATA a genera hopi discusion y
preguntanan entre esnan presente. Tur presente a bira mas consciente discutiendo con pa drecha nivel di servicio
aki na Aruba. Sra. Tijn Asjoe-Croes ta comenta cu pa añanan largo caba Gobierno y ATA ta enfoca riba calidad di
nos hendenan unda cu hospitalidad pa cu e turista ta importante. Amabilidad di Aruba su hendenan ta conoci, sin
embargo por mira atraves di e encuestanan haci cu e imagen aki a cambia. E Aruba cu tin hendenan cariñoso,
amabel y ta duna un man y guia na esnan cu tin mester, esaki ta e parti di nos identidad cu nos no mester perde
nunca. Gobierno a inicia un programa di Aruba Certificacion Program cu awor ATA orguyosamente ta maneha. E
programa aki ta enfoca netamente riba e aspecto di servicio. ACP a demostra di tin un impacto hopi positivo den
varios hotel. Kier pa e programa aki haya atencion nacional pa asina nos bishitantenan cu pa añanan largo ta bin
nos isla sintinan na cas y percura cu nan ta sigui bin nos isla. E prome dialogo a bay hopi bon y ya caba a sinta cu
otro grupo diamars. E di dos dia a sinta cu retails, taxista, watersports, tour operators y otro negoshinan. E meta
principal ta keda pa crea un comportacion nacional pa mehoracion di servicio cu lo pone cu e turista cu ta bishita
nos, sinti su mes bon y lo no tin dificultad ora e mester gasta riba nos isla.

http://www.24ora.com/local-mainmenu-5/107472-un-di-e-meta-nan-di-ata-ta-pa-subi-ingreso-
economico-di-turismo-pa-aruba