Page 39 - MIN.VOS MARCH 9

Health Care Conference Aruba ta tuma luga na
juni 2015

Monday, 09 March 2015 12:11

Comparti

Dianan 1 te 4 di juni 2015 ta tuma luga na nos isla e prome Health Care Conference Aruba (www.hcca.aw),
un idea cu a sali for di e ultimo reunion Inter Parlamentario di Reino Hulandes (IPKO).

E enfoke durante e conferencia lo ta pa yega na mas y miho colaboracion of pa reenforsa e colaboracion
entre e partnernan den Reino pa yega na solucionnan pa retonan comun den ramo di salubridad en
general.

Entre e partnernan trahando hunto cu Ministerio di Salud Publico bao maneho di Minister dr. Alex
Schwengle, ta entre otro Dr. Horacio E. Oduber Hospitaal, Instituto Medico San Nicolas (ImSan) y AZV,
como tambe EXPO Salud pa cu organisacion di e conferencia. E conferencia ta ofrece un plataforma
amplio pa discusion y dialogo tocante cuido di salud, pa presenta pregunta y retonan pa wordo trata riba
diferente nivelnan unda decisionnan crucial ta wordo tuma den e sistema di cuido. Meta ta pa trece
profesionalnan den e sistema di cuido hunto, esunnan cu ta responsabel pa legislacion y politiconan pa
dialogo y yuda otro yega na e miho solucionnan.

Health Care Conference Aruba lo tin como enfoke cuater tema importante: (1) E sistema di cuido di salud
den comunidadnan chikito den Caribe; (2) Cuido di salud: for di un sistema cu enfoke riba produccion pa
un sistema cu enfoke riba calidad; (3) For di cuido dividi (cada parti riba su mes) pa atencion integra
(cuido holistico); y (4) Colaboracion den y entre e paisnan partner den Reino Hulandes.

Recientemente a tuma luga un reunion cu e stakeholdernan den ramo di salubridad na Aruba, organisa pa
Minister di Salud, Deporte y Cuido di Nos Grandinan, dr. Alex Schwengle pa anuncia detayenan di e
conferencia. E mandatario a subraya cu e conferencia ta resultado di un necesidad expresa dor di e
participantenan na e ultimo IPKO y ta dirigi na tur grupo di interes den cuido. E no ta concerni Gobierno
of departamento so, pero ta temanan cu ta toca nos tur y e sosten di e stakeholders ta importante pa pone,
alcansa metanan y solucionnan win-win hunto pa un maneho di cuido di calidad halto y sostenibel.

Aruba tin “universal healthcare” (seguro di salud pa henter e populacion) via di AZV, pero ta dificil pa
mantene y mester di maneho mas estricto den areanan manera remedi y laboratorio, pero ni con hopi
logra baha e gastonan, esaki tin su limite pasobra mester sigui mantene e cuido na un nivel di calidad
halto.

Minister Schwengle a remarca cu bahamento di gasto tin su limite y colaboracion bira mas importante,
unda cu por spaar mas placa pa medio di cumpra remedi hunto, cumpra cuido den exterior hunto y
cumpra aparatonan hunto, por ehempel. “Pues e colaboracion ta suma, sumamente importante p’e futuro
di salubridad tambe di Aruba,” el a conclui.