Page 10 - Utilities

A4

LOCALDiabierna 4 September 2015

Who si to blame? Wega cu responsabilidad?
Nos no ta uza mal experiencia pa mehora!

Despues di e problema na aeropuerto cu a presenta algun siman pasa cu e ekipo di Meteo, por
a mira y tende zundramento, critica, y di e suspension di un persona cu supuestamente lo ta e
responsabel pa e material cu a faya, of pa e back up cu tabata t’ey, pero no tabata t’ey. E conse-
cuencianan tabata serio, no solamente den placa cu mester a paga pa atende e pasaheronan cu
no por a biaha, tambe nos reputacion como pais riba su mes.
Un biaha mas nos ta duna e impresion na mundo cu e bachi di autonomo/independiente/riba
nos mes, ta keda nos grandi.
Mientras cu talbes un parti di nos opinion publico lo ta contento cu en todo caso ya a identifica
un persona cu lo ta responsabel pa e debacle aki, henter e asunto aki no ta satisface hopi otro.
Nan ta puntra nan mes si ta asina facil ta resolve e problemanan aki, mencionando y must-
rando un persona cu a faya .
E berdad ta cu probablemente no a resolve ningun problema ainda. Un di e preguntanan clave
den henter e asunto aki ta: no ta esun cu ta encarga cu e servicio ey mester a percura pa esun
cu no a haci su trabao, pa el a haci su trabao? Den un caso asina nunca e por ta e asunto di
un persona so , cu no a percura pa debido control pa no pasa loke a pasa. E no tin superior cu
mester a percura pa supervisa su trabao? Of hefe ta wordo poni responsabel, of no, segun nan
afiliacion politico?
Otro ehemplo reciente ta e situacion den KIA, unda ni rapport di instancia internacional no ta
parce di ta pone hende move pa mehora cosnan cu no mester t’ey na prome luga. Tur loke nos ta
haya tende di e mandatario envolvi ta cu e ta haya cu e criterionan cu e Comision Europeo aki
ta aplica ta mucho halto. Kico e mes ta bay haci pa remedia algo cu mester a drecha aña atras
caba, esey nos no ta haya di tende. Loke si el a logra haci ta percura cu e poco hendenan cu ta
desea di drecha cos eyden, mester sali pa laga e luga pa e otronan.
Algun tempo pasa nos a haya nos confronta cu prijs di crudo y di producto petrolero a cay, pero
nos ta sigui paga un prijs di casi 100 dollar pa bari pa heavy fuel oil pa WEB, pasobra un
grupo di sabi a dicidi di hedge prijs halto pa par di aña pareu. Aki tambe a core nombra ‘skape-
goat’ y a forsa tuma su retiro, pero no a bay wak mas leu ken tambe tabatin responsabilidad den
esaki. Djis pa menciona un aspecto masha simpel di e structura legal dentro di cual ta traha
na WEB: statuutnan ta bisa cu pa cada asunto cu ta encera un suma di mas di Afl. 200 mil, e
director no por tuma decision y mester bay su Hunta di Comisario.
Pues nan tambe tabata carga responsabilidad! Nan a baha? Esun cu a baha tabatin otro prob-
lema adicional di conflicto di interes cu e compania cu ta bay bende gas cu WEB, pero esey ta
otro storia.
Loke si e ministro a haci ta core laga un accountancy di renombre traha un rapport unda di
antemano a exclui e nivel di e ministro mes di e investigacion, mientras cu ta e mes tabata gaba
den Dialogo Social y dilanti camara di television cu ta e a duna orden pa bay hedge. Awor cu
e barco a pega anto otro persona mester carga responsabilidad. E asunto no a keda resolvi pero
como bon Arubiano nos a laga e asunto ey sosega, aunke cu tur dia e ta costa cada ciudadano
un parti di su entrada.
Pero tin un aspecto mas liga na e incidentenan aki: e asunto financiero. Por ta cu mas y mas
no bay tende di problema den departamentonan cu pa motibo di falta di recurso no por haci nan
trabao manera mester ta?
Conclusion: un di e fayonan grandi den nos sistema di gobernacion en general ta cu no ta uza
incidentenan negativo pa saca conclusion y realmente mehora e procedemento di control. Y no
solamente mehora, pero laga publico en general sa tambe kico y con a mehora.
Ta imposibel pa un mandatario considera cu transparencia den e tipo di caso asina lo ta mal
propaganda pa su mes, a menos cu e tin cos pa tapa pa su mes o pa su hendenan.