Page 23 - 24.5x35cm Citgo bini

Aruba ta prepara materia prima pa refinerianan na Merca
Refineria na Aruba ta comberti producto "inutil" den un producto financieramente

significante
E refineria na Aruba lo no produci gasolin, diesel, ni otro productonan cu ta yega
directamente na e cliente no-comercial/industrial, pero ta provee e servicio di un proceso
sumamente importante pa PDVSA y CITGO como "Extra-Heavy Crude Upgrader".
Dos factor cu sigur a hunga un rol grandi pa CITGO dicidi di negocia cu Aruba tocante e
refineria, ta "tempo" y "costo". Si CITGO a scoge pa construi su mesun "EHC Upgrader" e lo
costa 8.000 miyon (8 biyon) dollar Mericano y lo tuma 6 aña pa realisa. E convenio cu
Refineria di Aruba ta resulta den un inversion di 700 miyon dollar Mericano y CITGO lo tin e
facilidadnan funcionando na 100% denter di un periodo di apenas dos aña despues cu nan
cuminsa cu e trabaonan necesario pa "start up" e refineria bek.
E refineria lo ricibi un tipo di crudo cu ta "extra pisa" (EHC, Extra-Heavy Crude). Den su
forma original e ta un producto cu ta "inutil" sin un proceso special pa hacie uzabel den e
industria di petroleo. E materia prima lo wordo importa for di e area di Orinoco, conoci
como e "Faha di Orinoco"/"Orinoco Belt", na Venezuela.
E producto ta pasa pa un proceso cu ta uza un asina yama "diluente", cu ta un substancia cu
ta yuda hacie mas fini. E diluente ta wordo recicla entre e pre-procesamento na Venezuela y
e upgrading cu ta tuma luga na Aruba.
EHC cu e diluente agrega na su entrada na Aruba tin un balor di apenas US$5 pa bari. E
producto su balor ta subi for di $5 pa $17 durante di su procesamento na Aruba.
Loke e refineria na Aruba ta produci ta inclui Naptha - un diluente pa EHC cu ta bay bek
Venezuela pa wordo uza den e proceso pa prepara e EHC prome cu e wordo manda pa
Aruba; y Vacuum Gas Oil (VGO) - un producto basico cu ta wordo uza pa subi e "output" di
diesel y gasolin for di refinerianan.
E otro dos productonan cu ta sali di e proceso ta un asina yama "destillate", y "vacuum
residual".
Loke ta wordo produci na Aruba ta wordo exporta pa Merca y ta bay na e refinerianan di
CITGO, unda cu nan ta wordo procesa y comberti den productonan cu ta subi mercado,
incluyendo diesel, gasolin y lubricantenan. E Naphta ta wordo bendi cu PDVSA pa uzo como
"diluente" pa EHC.
E refineria na Aruba ta bay produci 209 mil bari pa dia.
E proceso cu e refineria na Aruba ta capacita pa haci despues di e trabao di "upgrade" e
refineria y combertie den un asina yama "EHC Upgrader", cual lo tuma un maximo di dos
aña, ta traduci den un margen di ganashi significante. E ganashi finalmente ta depende di e
prijs di crudo riba mercado internacional.

END