Page 14 - MIN JUS 6 APRIL 2016

Director di SVb ta expresa su preocupacion encuanto registracion di
trahadornan cu permiso di Dimas

Publication: Tuesday, 5 April 2016. Categoria: General

ORANJESTAD (AAN) — Un tempo atras, SVb a informa
comunidad di e proyecto di intercambio di informacion cu tin entre SVb y DIMAS.
E prome cifranan di e intercambio aki tabata mustra un situacion preocupante y pa tal motibo nos a probecha pa puntra sr.
Jacobs, director di SVb, con a sigui cu e proyecto aki.
SVb-DIMAS
Sr. Jacobs a cuminsa na indica cu en berdad, a base di un protocol di intercambio di informacion, SVb a ricibi informacion di e
permisonan di trabou otorga pa DIMAS den e periodo di 2008 pa 2013. E meta di e intercambio aki tabata pa verifica si e
trahadornan aki a keda segura debidamente, conforme ley, na SVb.
Sr. Jacobs ta mustra cu den e periodo di 2008 pa 2013, DIMAS a alarga, cambia doño di trabao of cambia tipo di permiso pa
permiso di estadia cu permiso pa traha den loondienst, un total di 17.208 permiso.
E cantidad di permiso aki ta representa 17.208 añanan di seguro. Di esaki, 13.051 tabata realmente segura na SVb y 4.157 no
tabata segura, manera ley ta prescribi. Esaki ta representa un 24,2%.
Trahador desprotegi:
Mas leu sr. Jacobs ta splica cu e 17.208 permisonan aki a keda otorga na 6.789 trahador cu lo a traha na 719 doño di trabao. Di
e 6.789 trahador, 1.792 no tabata inscribi na SVb, representando 26,4%.
Ta nifica cu durante cu e personanan aki a traha na Aruba, nan a traha desprotegi socialmente. Y esaki, segun sr. Jacobs, no ta
aceptable y no ta conforme nos leynan di seguronan social.
Sr. Jacobs a continua mustrando cu di e 719 doñonan di trabao cu a ricibi un permiso pa un trahador durante e periodo 2008-
2013, 140 no tabata registra cerca na SVb (19,5%). Otro desaroyo cu no ta corecto.
Consecuencia financiero
Riba nos pregunta kico e desaroyo aki a nifica pa e fondo, sr. Jacobs a elabora riba e consecuencia financiero. Segun sr. Jacobs,
si nos asumi cu tur e trahadornan aki a ricibi como sueldo e salario minimo, ta calcula cu durante e periodo 2007-2014, e
fondonan di malesa y accidente a keda sin ricibi 3,09 miyon florin na prima. Suponiendo cu minimo e cantidad di permiso alarga
na 2013 lo a keda alarga na 2014, nos ta calcula cu e fondonan a keda sin ricibi 3,25 miyon florin durante e periodo 2007- 2015.
Banda cu e no ta husto pa doñonan di trabou cu si ta haci nan best y cumpli cu SVb, ta mes o mas preocupante cu e
trahadornan a traha sin proteccion social.
Sr. Jacobs a mustra cu aña pasa a manda carta pa e compania cu a haci e peticion pa e trahadornan aki. E proceso ta canando
lento. Doñonan di trabou en cuestion no ta cooperando, asumiendo nan responsabilidad cu segun e werkgeversverklaring cu
nan a firma pa e permisonan cu nan tin.
36,4% no ta registra
Pa enfatisa e situacion preocupante aki, sr. Jacobs ta sigui relata cu recientemente e intercambio di informacion cu DIMAS a
pasa pa un otro nivel. Awor a cuminsa intercambia informacion riba peticionnan actual. Y e prome resultado ta mustra cu di e
peticionnan pa trahador cu DIMAS ricibi pa alarga 36,4% di e trahadornan no ta registra na SVb, conforme e leynan di seguro di
malesa y seguro di accidente.
SVb ta considera e desaroyonan aki preocupante y socialmente no ta aceptable, caminda trahadornan ta traha desprotegi.
Posibilidad pa boet
Riba nos pregunta na sr. Jacobs, kico por ta medidanan cu por tuma pa contra aresta e situacion aki, sr. Jacobs ta splica cu
banda di suministra informacion pa concientisa trahador y doñonan di trabou riba nan derecho y obligacion, kisas ta necesario
otorga SVb e posibilidad di imparti boet na momento cu control di SVb constata cu un doño di trabou tin trahador den servicio
cu no ta sigura.
Cu e instrumento di sancion aki, por cuminsa ta contra aresta e fenomeno di trahadornan desprotegi riba nos isla.

http://www.diario.aw/2016/04/director-di-svb-ta-expresa-su-preocupacion-encuanto-registracion-di-
trahadornan-cu-permiso-di-dimas/