Page 14 - HOH 8 APRIL 2016

Mama di 22 aña a fayece na Hospital despues di haya morocho
Publication: Thursday, 7 April 2016. Categoria: General

Baby homber a fayece riba Diabierna Santo!

ORANJESTAD (AAN): E dianan aki riba Facebook tabata tin hopi reaccion relaciona cu e fayecimento di un mama
di apenas 22 aña cu a muri na hospital, algun dia despues di a duna luz.

E señora Valerie a haya dos baby (morocho). Un mucha muher y un mucha homber. E ultimo aki a fayece tambe.
Informacion ta mustra cu Valerie a drenta hospital cu presion halto. Mas cu un siman largo el a keda sufri cu un
centimeter habri. Ta cuestiona pakico e ginecologo no a wordo avisa ora cu Valerie tabata tin 9 centimeter habri. Ta
te mainta, ora cu doctor a haci bishita na su pacientnan cu doctor a haya sa cu Valerie tabata cla pa haya yiu.
Segun informacion cu DIARIO a bin haya sa ora doctor a drenta camber a bin haya Valerie sin pulso y morto tur
na saca y su so den verloskamer.
Ta calcula cu lo a transcuri 10 minuut despues cu e señora a muri y cu doctor a drenta den camber. E momento ey
no por a haci nada mas pa hiba Valerie den sala di operacion y eynan mes, den verloskamer a corta pa saca e
babynan for di e barica.
E prome baby cu a nace tabata e mucha homber. El a muri riba Diabierna Santo despues cu machine a ser kita di
dje. Segun informacion, e tabata clinicamente morto pa motibo cu ora e mama su curazon a para, e sanger no
tabata manda oxigeno mas pa ningun di nan tres.
E version ta mustra cu a reanima e mama, pero e tambe a keda clinicamente morto y a fayece diahuebs siman
pasa ora cu a dicidi di kita machine, sin consulta cu e famia y pon’e den e segundo piso den kamber 218. Ademas, a
ser bisa cu docternan lo a reuni pa avisa e famia kico lo tabata e decision relaciona cu e estado di Valerie.
E famia lo a wordo prohibi pa drenta kamber. Un persona ayega di misa lo a haya chens pa drenta den kamber y
riba Facebook el a post un video unda por a wak ora e ta combersa cu Valerie pa wak si en berdad e tabata
clinicamente morto
“A ta prueba el a habri su wowo, el a scuchami y el a corespondemi cu su wowo nan. El a yora, ma seca su
lagrimanan pero na sintimi conforme di por a mustre mi amor como mama cu mi ta, ma braze pensando con e lo a
desea su mama ta cune na e momentonan aki.
Ma primintie di cuida su jui cu ta keda atras te ora su casa un dia bin buske. Dios a pone desde un principio den e
obra aki pa un persona cu no ta mi famia pero na final mi a siña stime manera un jiu mas. Tur tempo Valerie por a
scucha mientras e tawata supuesto clinicamente morto, solamente e tawata bao dosisnan fuerte y nan tawata
mantene drumi mas tanto”. E ultimo aki ta loke e persona aki a publica ayera diaranzon riba su cuenta di Facebook.
E famia kier claridad riba kico precis a pasa cu e hoben mama di 22 aña y su baby homber, unda cu e yiu muher si
a keda bibo pero sin su mama.
Hopi forza na e famia.

http://www.diario.aw/2016/04/mama-di-22-ana-a-fayece-na-hospital-despues-di-haya-morocho/