Page 89 - MIN VOS 8 SEPT 2015

PAGINA 28 DIARIO DIAMARS 8 SEPTEMBER 2015

Hectarnan di Diamanta

Na 1884 na Merca un pastoor yama Russell Conwell a funda
Temple University gratis pa hobennan menos fortuna. Pa
por a cuminsa e universidad Conwell a biaha rond Merca
contando storia. E curioso ta cu Conwell a conta e mesun
storia mas cu 6000 biaha cu a permitie recauda suficiente
fondo pa e por a habri e universidad. E storia yama
“Hectarnan di Diamanta” y ta bay como lo siguiente:

Hopi aña pasa na Persia tabata biba Ali Hafed. Ali Hafed
tabata doño di un gran finca cu plantacionnan y hardinnan.
Ali Hafed tabata un homber rico y contento. E tabata
contento pasobra e tabata rico y tabata rico pasobra e tabata
contento. Un dia Ali Hafed a haya bishita di un sacerdote
Budista considera un di e sabionan mas grandi di su tempo.
E sacerdote a conta Ali Hafed cu si e ta tin un diamanta
tamaño di su duim, e lo por cumpra henter e pais y si e ta
tin un mina di diamanta su influencia lo por haci su yiunan
rey.

E anochi ey, despues di a tende e storia di diamantanan,
Ali Hafed a bay drumi un homber pober. No cu e la perde
nada, pero e tabata pober pasobra e tabata tristo y tabata
tristo pasobra cu e ta tin miedo cu e tabata pober. Henter
anochi Ali Hafed a keda lanta ta pensa cu “e kier tin un mina
di diamanta.” Su manece Ali Hafed a bende su finca y tur
su propiedadnan y cu e placa e la sali en busca di diamanta
lagando su famia cu su bisiñanan. Despues di a gasta tur
su placa ta busca diamanta sin resultado, Ali Hafed a keda
den miseria y pobreza total. Para tur tristo na e playa di
Barcelona na Spaña, ora cu e la mira un ola gigante ta bin
aden, e no por a resisti e tentacion horibel di caba cu su bida
door di hoga su mes pa nunca mas mira of tende di dje.

Mientrastanto un dia e homber cu a cumpra e finca di Ali
Hafed tabata cu su camel den su hardin. Ora cu e camel a
hinca su nanishi bou di awa den e riu cu tabata core door
di e plantacion, Ali Hafed su sucesor a ripara algo ta briya
curioso den santo den e riu. E la hinca su man den e awa y
a saca un piedra preto cu ta tabata refleha tur e colornan di
regenboog. E la coy e piedra straño y a hibe paden y a pone
ariba un mantel banda di e schoorsteen pa despues lubida
ariba dje.

Algun dia despues e mesun sacerdote cu a bishita Ali
Hafed a bolbe bin di bishita y ora cu e la drenta paden y a
wak e briyo di e piedra ariba e mantel e la core bay den su
direccion y a grita:”Heeeey esaki ta un diamanta; Ali Hafed
a regresa?” “No, no, Ali Hafed no a regresa y esey no ta un
diamanta. Esey ta un piedra cu nos a haya pafo den e riu den
nos hardin.” “Pero”, e sacerdote a bisa: “mi ta bisa bo cu
mi sa con un diamanta ta mustra ora mi wak un ... y esey ta
un diamanta.” Nan dos a core bay pafo y den e riu a bolter
e santo cu nan dedenan. Increiblemente mas di e piedranan
precioso a bin halto, algun mas grandi y valioso cu e prome.
Y asina a descubri e mina di diamanta di Golianda, e mina
di diamanta mas magnifico den historia di humanidad. E
Kohinoor y otro di e briyante nan mas grandi na mundo a
bin for di e mina aki. Si Ali Hafed lo a keda cas y a busca
den su propio hardin, luga di miseria, pobresa y morto e lo
ta tin “hectarnan di diamanta.”

E moral di e storia ta masha cla: Si e prome doño a tuma
su tempo pa studia y prepara su mes pa sa con un diamanta
den su forma bruto ta mustra y a tuma tempo pa explora su
propiedadnan prome di a busca otro caminda tur su soñonan
lo a bira realidad. Hopi biaha nos ta cudisha cosnan di otro
sin realisa cu nos ta para ariba nos propio “hectarnan di
diamanta.” Si na un forma inteligente y efectivo nos explora
nos mes y e trabou cu nos ta haciendo awor, nos lo ripara cu
den nos tin tur e rikesanan cu nos ta buscando.