Page 14 - Minister Mike De Meza

A4

LOCALDiamars 25 Augustus 2015

Premier Eman cu otro descubrimento:
“Refineria berde”

Prome Ministro Eman a bay y bolbe di Hulanda, sin tanto show y buya manera di
custumber. Pero e no por a keda sin sorprende nos comunidad cu algo nobo: un refineria
‘berde’. Ta parce cu tur cos tabata planifica di antemano: prome a promove un hotel di
casi mil camber; despues negociacion cu Citgo na Houston y pa un motibo desconoci a
keda sin sigui pa San Antonio pa papia di biaha cu doño mes di e refineria. Of talbes a
bay San Antonio pero ta nos no sa…
Na regreso di premier Eman di Hulanda, a divulga como e resultado mas evidente cu lo
bin un comision mixto entre e dos gobiernonan, pa studia e posibilidadnan di desaroyo
na San Nicolas. Esaki ta zona positivo, pero alabes ta lanta pregunta: awor no mas nos
mester bay kibra cabes kico ta e miho rumbo pa San Nicolas? Gobierno mes na 2010
no a laga Pennsylvania University traha henter un estudio di e posibel desaroyo di cen-
tro comercial di San Nicolas, e refineria y Sero Colorado? Den e rapport extenso ey ta
señala cu a lo largo e refineria lo stroba un desaroyo sano nobo di e ciudad. Esaki pa e
simpel echo cu e situacion unico di un ciudad pega riba un refineria, of un refineria pega
riba e ciudad, no por bay keda asina. Y si San Nicolas no por muda, anto e refineria
mester bay, tabata nan conclusion. E desaparicion di e refineria lo a crea e oportunidad
pa e ciudad haya un ‘waterfront’, e conexion cu lama cu e luga nunca tabatin y cu por
crea henter un variacion di posibilidad nobo.
Pero, pa kita tur duda den e asunto aki: kico ta un refineria ‘green’? Kico Premier
Eman kiermen exactamente cu un refineria ‘green’. Nos no sa esey, pero laga nos anali-
sa pa nos mes kico un refineria ‘berde’ por ta. Pa cuminsa, den tur industria na mundo
awendia ta existi e tendencia di traha cu e ultimo tecnologia disponibel. E avancenan
tecnologico cu ta bin integra den e sistemanan nobo, hopi biaha ta encera caba cierto
mehoracion y eficiencia, cu ta haci cu e metodo nobo ta funciona mas limpi, ta uza me-
nos energia, ta produci menos gas toxico y otro desperdicio, den cumplimento cu leynan
ambiental cu nos pais no tin.
Ora bo ta desea di renoba un refineria, di mes bo ta cumpra e tecnologia di awe y no
esun di 50 aña pasa, pasobra ta esun nobo ta disponibel. P’esey cu di mes un renobacion
di un refineria, y esun di Aruba no ta un excepcion, ta trece cun’e un adelanto den efi-
ciencia y un proceso mas limpi. Pero esey no ta nada di otro mundo, tur hende por subi
internet y haya e informacion aki. Awor Premier Eman ta bay te Hulanda pa algun
Hulandes conta e y su delegacion cu bo no mester di scoge entre un hotel y un refineria,
pero cu bo por keda cu tur dos, pasobra ta existi ‘refineria green’? Anto nos a keda cla, a
resolve e ‘dilema’ cu e mes a crea un par di siman atras! Impresionante…
E problema, sin embargo, ta den otro detaye. Laga nos tuma como ehempel e intento pa
yega na un refineria nobo desde 2007 na Merca, e caso di Elk Point refinery na South
Dakota, unda un compania di Texas a purba construi e unico refineria grandi nobo na
Merca desde 1977.
Tras hopi bataya den corte riba tur sorto di aspecto ambiental finalmente e proyecto no
por a cuminsa. Pero tabatin un detaye remarcabel cu ta interesante pa Aruba: e com-
pania den su plannan tabatin encera un ‘buffer zone’ di varios miya rond di e refineria
unda no lo tabatin ningun tipo di urbanisacion. No solamente pasobra nan ta haya
esaki bunita, pero pasobra reglanan ambiental actual ta exigi esey!
Si nos ta bay aplica norma masha comun den separacion di industria y area di resi-
dencia, nos no por tin e refineria eynan mas. Pero, mas cu tur cos, laga nos enfatisa
un biaha mas cu aki no ta e posibilidadnan tecnologico di renoba e refineria ta dicta e
resultado di cualkier intento: ta e posibilidad di un bida economico nobo pa e refineria
cu ta haci esaki. Si no tin un inversionista cu e cartera grandi cu ta dispuesto y capaz
di hinca 2 pa 3 biyon dollar den e asunto, y prepara pa gana su placa bek den e proximo
20 pa 30 aña, por keda soña di un refineria ‘green’ o di cualkier color cu bo ta desea; e
no ta bira realidad.
E caminda cu e refineria aki a cana den e ultimo 30 aña no ta duna mucho espacio pa
optimismo, ni cuanto storia bunita nos ta haya di nos Prome Ministro despues di su
ultimo biahe. Y, asina leu cu nos investigacion ta yega, CITGO no ta e partner cu e
cartera grandi cu ta busca. Pa haya sa esey tampoco mester a biaha pa Hulanda, esey
tambe ta riba internet.q