Page 42 - Djasabra 10 mart 2018.pdf

42 Djasabra 10 Mart 2018
Movementu
Progresivo ke
klaridat riba plan

nobo
WILLEMSTAD.-
Parlamentario pa Movementu
Progresivo Marilyn Moses
ke haña klaridat relashoná
ku zonifikashon. E ta bisa
ku zonifikashon ta di suma
importansia pa ordená i
desaroyá un pais.
For 1995 Gobièrnu ta
apliká e lei di Eilandelijk
Ontwikkelingsplan Curaçao,
EOP, sin ku a revisá e lei aki ni
un biaha. E lei mes ta indiká
ku kada 5 aña mester revis’é.
Ekonomia ta stanká pa mas
ku 20 aña kaba. Aña pasá
nos ekonomia a asta krem ku
1.5 porshento. Tambe nos por
mira problemanan a kuminsá
surgi den nos komunidat
manera por ehèmpel molèster
di zonido i tambe di holó
desagradabel di krio di galiña,
netamente dor di falta di un
bon plan di zonifikashon den
pasado. Mas tardansa den un
plan di zonifikashon nobo lo
kondusí na mas problema i
desórden riba nos Isla.
A base di e ariba menshoná
frakshon di Movementu
Progresivo ta hasi minister
di Transporte, Tráfiko i
desaroyo Urbano e siguiente
preguntanan. Entre dia promé
di yüni 2017 i 28 di febrüari
2018, kuantu invershonista
a hasi petishon pa pèrmit
di konstrukshon? Entre dia
promé di yüni 2017 i 28
di febrüari 2018, kuantu
invershonista a risibí pèrmit
di konstrukshon?
Di esnan ku a haña pèrmit
di konstrukshon, kua ta e
fecha ku a hasi e petishon di
konstrukshon?
Entre dia promé di yüni
2017 i 28 di febrüari 2018,
kuantu invershonista a
haña kontesta negativo riba
nan petishon pa pèrmit di
konstrukshon?
Minister por indiká kua ta
e motibu pa ninga e pèrmitnan
aki di konstrukshon?
Kuantu proyekto tin ku
apesar ku nan a haña pèrmit
di konstrukshon no a kuminsá
konstruí ainda durante di e
último 5 añanan?