Page 113 - MIN VOS JULY 17 2015

Mas y mas hende muher ta sigui haci uso di tratamentonan
di Mesoterapia

Publication: Friday, 17 July 2015. Categoria: General

Apesar di e risico y procedencia dudoso di e productonan :

ORANJESTAD (AAN): Beyeza ta un asunto cu tur hende muher kier tin. Pero e problema den
esaki ta cu tin personanan cu no ta preocupa cu e hecho cu pa alcanza cierto grado di beyeza nan
ta poniendo nan bida na peliger.

Un di e maneranan pa alcanza e beyeza desea ta haciendo uso di cierto tratamentonan estetico
pa logra un mihor apariencia. Un di e tratamentonan famoso ta esun conoci como “Mesoterapia”.

Den pasado DIARIO a haci diferente yamado di alerta pa e hecho cu Aruba a bira un mercado
hopi vulnerable pa loke ta e entrada di productonan di procedencia dudoso usa den algun salon di
beyeza, ”spanan” of door di personanan cu ta bin Aruba cu e intencion di haci ganashi
ofreciendo tratamentonan pa baha peso of reduci medidanan sin necesidad di liposuccion of kita
e lachinan di e cara sin cu mester di ningun operacion.

Sinembargo, tog ta constata cu ainda e tratamentonan aki ta wordo ofreci na Aruba.
Posiblemente tin personanan cu a prepara nan mes y a sigui algun curso of un carera den e tereno
di estetica. Pero na otro banda, tin esnan sin escrupulo cu ta sigui ofrece milagernan y tambe tin
hende cu ta cay facil den e mercado clandestino aki como clientenan vast.

Den pasado, y algun luna atras, Inspeccion di Remedi di Aruba a confirma cu e practica aki ta
wordo realiza na Aruba ainda.

E problematica den esaki ta ora cu ta usa productonan cu no ta aproba y cu por contene
ingredientenan peligroso pa e curpa. Banda di esaki, tin e situacion unda mas y mas persona ta
wordo poni den man di supuestonan experto y na final ta resulta cu e tratamento cu nan a haya a
produci un infeccion hopi severo den nan curpa (barica, cara, “chanchan”, pianan, etc).

Tin casonan tristo cu a sosode caminda tin personanan cu a perde nan bida y asina mes tambe
tin esnan cu no tin durf di haci denuncia.

Ta pesey cu ta sigui haci un yamado pa tene cuenta cu e personanan cu ta ofrece bo un servicio
di Mesoterapia of algo similar. Check bon su background, ki sorto di productonan e ta usando y
si e productonan aki ta reconoci of a wordo aproba na Aruba door di Inspeccion di Remedi.

Den casonan dudoso haci e denuncia na autoridad pa asina yuda caba cu un mercado
clandestino cu ta persisti na nos isla.