Page 20 - ARUBA BANK

ORANJESTAD (AAN) – Gobierno a yama un conferencia di prensa extraordinario,
diabierna atardi, den cual Minister di Economia y Finanzas mr. Xiomara Maduro, a haci

un anuncio importante relaciona cu belasting.

Minister Presidente mr. Evelyn Wever-Croes y Minister di Husticia mr. Andin Bikker,
tambe tabata presente pa asina brinda nan apoyo, cu un bon noticia.

Minister di Finanzas a referi na e anuncio cu Minister di Asunto Social a haci siman
pasa, tocante e aumento di salario minimo. E mandatario a splica cu door di e aumento
aki, gobierno a haci cierto ahuste pa loke ta trata inkomstenbelasting y loonbelasting.

Esakinan ta wordo atendi di forma cu e montante di entrada cu ta liber di impuesto ta
wordo aumenta, y hunto cu esaki tambe a dicidi pa a rebaha e loonbelasting y
inkomstenbelasting cu mesun porcentahe di inflacion di e aña aki, cu segun dato di CBS
ta 4%.

E mandatario a menciona cu pa largo tempo den e leynan di belasting tabata tin e
obligacion pa ora cu tin inflacion ahusta automaticamente e loonbelasting pa tene

cuenta cu inflacion. Pero despues, na 2015 e gobierno di e momento ey y su minister di
finanzas a dicidi pa saca esaki for di e ley y laga na discrecion di e mandatario si haci e
ahuste of no.