Page 77 - KPA MAY 20,2015

Aprobacion di beurs adicional pa
studiantenan cu Arubalening na Corsou ta
den proceso final

Desde algun luna Minister di Enseñansa, Michelle Hooyboer-Winklaar, ta den dialogo cu
studiantenan Arubiano na Corsou relaciona cu e aumento repentino di “collegegeld” cu nan a
wordo confronta cune e aña academico aki. Mirando cu e decision di Universidad di Corsou
(UoC) a wordo tuma y publica hopi laat, a haci’e imposibel pa Departamento di Enseñansa por a
anticipa riba e cambionan aki pa por adapta e sumanan den fianza di estudio di Aruba.

Consecuentemente e studiantenan a encontra nan mes den un situacion financiero hopi dificil pa
cual mester a bin un solucion. Via di fondonan procedente di Hulanda cu ta aloca pa beurzen,
Minister Hooyboer-Winklaar ta procesando e aplicacion pa e beurzen aki ser paga mas pronto
posibel pa studiantenan cu Arubalening na Corsou.

Cada studiante di Aruba cu Arubalening studiando na Corsou lo ricibi e aña aki un suma
adicional di Afl. 2000,- den forma di un beurs. E suma aki ta mas halto cu e suma di Naf 1000,-
cu cual UoC a subi e collegegeld, pero Minister Hooyboer-Winklaar a mira e necesidad pa
recompensa e studiantenan na un manera mas amplio pa asina nan por cubri cualkier gasto
adicional cu nan por tin. E tramitenan necesario di aplicacion ta den proceso y ta spera un
resultado positivo pa e fondonan aki por ser traspasa pa e cuenta bancario di e studiantenan mas
pronto cu ta posibel.

Pa otro aña academico Minister Hooyboer-Winklaar ta trahando ariba fondonan adicional pa hisa
e suma di Arubalening como un solucion structural pa e studiantenan na Corsou pa asina e
studiantenan no mester haya nan mes den un situacion financiero tenso y pa nan por enfoca riba
nan estudio sin preocupacion. Esaki specialmente pasobra a tuma nota caba di e segundo
aumento di collegegeld di Universidad di Corsou e aña academico venidero.

E studiantenan di Aruba na Corsou y region tin hopi prioridad pa Minister Hooyboer mirando cu
e mandatario ta kere cu mester facilita e studiantenan aki cu loke nan tin mester pa por studia
exitosamente.

Minister Michelle Hooyboer ta spera cu e beurs adicional lo por yuda e studiantenan na Corsou
substancialmente y ta gradici e studiantenan Arubiano na Corsou pa nan disponibilidad y
envolvimento positivo den e proceso aki.

http://masnoticia.com/aprobacion-di-beurs-adicional-pa-studiantenan-cu-arubalening-na-corsou-ta-
den-proceso-final/