Page 79 - MIN VOS 9 NOV 2015

Expectativa di bida saludable ta nifica cu e persona por biba mas largo, cu mehor calidad di bida
y cu e garantia cu e ta haya menos malesa cronico.

Un expectativa di bida no saludable, kiermen biba mas cortico cu un calidad di bida pober, y e
chens pa haya mas malesa cronico, por ehemplo: malesa cardiovascular cu ta encera ataca di
curazon, dolor di pecho, adernan coronario blokea, diabetes, problema di riñon.

Dr. Ordoñez a para keto un rato den e punto di Diabetes, pa expresa cu e cantidad di
diabeticonan cu tin na Aruba, ta hopi alarmante.

El a señala cu su meta pa duna e charla aki ta pa motiva nos hendenan di awe pa dilanti, pa
cambia nan estilo di bida sikiera un poco, pasobra radicalmente ta hopi dificil.

E dama a subraya cu di cada ocho pa diez persona na Aruba un ta diabetico y esaki ta confirma y
comproba, sin conta e casonan cu no ta conoci. Hopi hende por ta canando cu malesa di sucu
pero nan no sa, te e momento cu e cuminza sinti e sintomanan di e malesa.

E docter a referi specificamente na Diabetes tipo 2 cu ta esun mas tanto adkiri door di estilo di
bida, y no tipo 1 cu ta insulino-dependiente, y cu e persona practicamente ta nace cu e condicion
aki. Pero tipo 2 casi 70 pa 75 porciento ta den nos propio man si bira un malesa cronico manera
malesa di sucu y malesa di riñon, of den e caso di stroke cu por ta hemoragico of no hemoragico,
permanente of transitorio (T.I.A).

Dr. Ordoñez a señala datonan alarmante encuanto problema cu nier. Aworaki tanto na IMSAN
como na Hospital dr. Horacio Oduber, nan ta maneha un cantidad di 149 pacient cu ta ricibiendo
Dialisis.

Ta hopi alarmante di mira aworaki, con hende hoben entre 27 cu 32 aña tabata interna of ta
interna aworaki cu stroke. Recientemente, di 17 pacient interna diesdos tabata debi na stroke.
Esaki ta alarmante, dr. Ordoñez a acentua.

Dr. Maritza Ordoñez a puntra su mes: Y awor kico ta bay pasa cu nos hendenan di mas edad?
Kico ta bay ta di nos pension? Pasobra si e pacientnan hoben cu ta haya stroke ta keda cu algun
dificultad pa sigui traha, mas problema pa e fondo di pension ta bin ya cu ta e hobennan ta traha
pa cuida e grandinan nan pension.

Via dos potret di antaño e dama a ilustra e estilo diferente di bida di Aruba. Uno ta di aña di 1892
cu tabata tin e fort di kalki, y e otro di 1905 cu tabata tin cincuenta piscado so, y cu ta mustra
cuanto muher tabata traha. El mustra con e burico tabata e medio di transporte e tempo ey y
tambe canamento. E ta puntra su mes cuanto hende entre 27 y 32 aña e tempo ey por a haya
stroke? E ta kere cu ningun, pasobra apesar cu e tempo ey e trabao tabata mas pisa, e hendenan
tabata biba mas largo y ora nan tabata muri, tabata pa malesa desconoci casi sigur.

Den otro articulo den nos siguiente edicion, lo tin mas informacion di e charla interesante aki di
dr. Maritza Ordoñez.