Page 83 - MIN VOS 9 NOV 2015

Problema cardiovascular cerca hende muher a aumenta
drasticamente ultimo temponan

Publication: Monday, 9 November 2015. Categoria: General

Dr. Jaime Falconi den Congreso di Stroke:

ORANJESTAD (AAN) – Diasabra 7 di November awor, a tuma lugar den Renaissance e
“Congreso di Stroke 2015”.

Manera ta conoci varios orado a hiba palabra tocante e tema aki, y malesanan relaciona cu
stroke. Dr. Jaime Falconi a fungi como maestro di ceremonia.

E Congreso aki a wordo organiza pa Fundacion C.V.A Aruba, bao presidencia di sra. Hellen
Mohamed, Aruba Medical Assistance y Artsen Assitent Aruba, cu ta un organizacion
relativamente nobo pero cu ta sumamente activo dunando den organiza charla pa e asistentenan
di docter.

Dr. Falconi e elogia e organizacion aki cu ta hopi bezig pa traha di mehora e servicio pa e
pacientnan cu ta bin cera nan docter di cas y specialista y nan ta haciendo un tremendo trabao.

Den su introduccion, prome cu sra. Mohamed a tuma palabra, dr. Falconi a señala cu den ciencia
medico mayoria di test cu ta existi ta wordo haci cu hende homber, di cual raza cu e ta. Pero
masha poco e hende muher ta wordo envolvi si no ta cu e tin problema di cancer.

Pero nos a lubida, dr. Falconi a expresa, cu awendia hendenan muher a emancipa y nan kier ta
mescos cu hendenan homber, y nan ta haya e mesun malesanan cu hende homber, y esey ta
nifica, entre otro, malesanan cardiovascular.

Dr. Falconi a subraya cu e problema cardiovascular cerca hende muher a aumenta, ultimamente,
na un forma dramatico.

Segun graficonan publica pa National Stroke Association di Merca, ta mustra cu e aumento aki
tin di haber tambe cu e forma di estilo di bida, y ta indica cu e problema di hende muher cu haya
stroke ta cu hopi biaha nan ta keda nan so, mayoria di nan no tin e facilidad na termino largo y
hopi biaha nan complicacionnan cu ta bin despues ta hopi mas cu cerca hende homber.