Page 15 - AM200921
P. 15
Dialuna, 21 September 2020 AWEMainta 15
Dos homber a kere cu TDQ no ta conta pa San Nicolas
SEGUN informacion ricibi for di vocero suplente di
KPA, Liliana Rasmijn, a confirma cu tabatin 4 detencion
so a tuma lugar p’e TdQ cu a cuminsa diasabra 10:00pm.
Te cu awor, ta suma un total di 58 detencion, desde cu
Gobierno a introduci’e.
Mientrastanto den oranan di madruga a transporta
dos persona pa Warda di Polis na Macuarima. E dos
hombernan aki a kere cu den San Nicolas e regla di TdQ
no ta conta pa nan.
No ta conoci unda exacto a detene e dos personanan aki,
pero alrededor di 12:30am a hiba nan pa Warda unda nan
a pasa nan rest’i anochi.
Por a nota cu e defensornan di ley tabata un poco mas
activo compara cu prome, a nota cu a controla autonan
riba caminda y cu detencionnan a tuma lugar.
Habitante riba vloer no tabata morto
DIABIERNA den oranan di atardi Polis a bay un adres
den Colony pa asisti un ciudadano.
Segun e persona aki, e lo tin algun dia cu e no a mira un
conoci di dje cu e sa bishita.
E ciudadano a pensa lo peor, o sea cu e conoci di dje lo por
a fayece den e cas.
Polisnan na yegada a bay rond di e cas y a tira bista via
bentana.
Asina nan a logra mira cu e habitante tabata riba vloer.
Ora cu Polisnan a logra papia cu ne, el a bisa cu berdad
e ta sinti’e malo pa algun dia caba.
Loke a sorprende e agentenan tabata cu e persona aki a
bisa nan cu e ta su mesun dokter y cu e lo recupera.
Polis a papia cu ne for di un distancia, despues cu el a
lanta di e vloer y bay sinta bek den un sofa.
