Page 83 - min.vos

Polis a interveni pa calma tension y pone ordo na
Departamento di Higiena

Publication: Tuesday, 26 May 2015. Categoria: General

ORANJESTAD (AAN): No tabata facil dialuna mainta pa e trahadornan di e departamento cu
ta atende cu carchi berde. Un cantidad di persona cu a yega eynan for di marduga tabata pasa
dilanti di otro y na dado momento polis cu tabata presente mester a baha pa atende y pone ordo.
Tin hende ta yega kizas despues di 4or y e momento ey ya caba tur number a termina.

Ta 60 number ta duna. Esaki ta un decision cu minister di Salubridad Publico tambe a mantene
su mes na dje pasobra e personal cu tin na Laboratorium ta esaki nan por handle. E problema ta
keda na e mesun hendenan cu nan carchi di salud ta caduca y cu no ta atende na tempo cu nan
cosnan.

Dialuna mainta e hefe di e departamento di malesanan contagioso mester a sali papia cu polis cu
na final a bin coordina e situacion. Despues di un splicacion di e hefenan eynan, e agentenan a
saca tur hende pafo. Asina esnan cu tin number official tabata wordo permiti pa drenta e
localidad.

Diez tabata drenta prome y djey otro dieznan. Asina tabata bai te ora a yega na e 60 personanan
cu si tabata tin number. Tabata tin masha comentario di bendemento di number etc eyfo pero
esaki tabata mas bien storianan traha cu mas bien a trece mas problema marduga pa mainta. Tin
hende rabia pasobra nan a yega 5or y no por a haya servicio. Otronan tin ta tuma liber di trabou
tres dia caba pa bin para den rij pero ora nan yega marduga no tin mas number.

Tin cu a yega 1or di marduga pa asina nan por a haya number y ta splica cu pa 4or di marduga
number a caba. Awor mirando e situacion minister tambe a wordo poni na altura. E ta
compronde henter e situacion pero no por pone mas hende na laboratorium pa motibo di e
problema aki.

Cada doño di negoshi y e persona mes mester ta responsabel cu su carchi di salud y higiena. Un
sugerencia tabata pa pone un seguridad di CEA eyfo mey anochi y reparti e numbernan y asina
ora e 60 numbernan caba ta notifica esnan cu a yega laat cu no tin mas. Asina ta evita cu hende ta
bin marduga keda te mainta sin haya chens. Mientrastanto parce cu e control riba e restaurantnan
y takeaway ta bai on hold pa dos siman segun e minister.

http://www.diario.aw/2015/05/polis-a-interveni-pa-calma-tension-y-pone-ordo-na-departamento-di-
higiena/