Page 30 - flip min jus

Trudy Hassell ta haci un suplica na comunidad pa contribui
na trabao pa e presonan

Publication: Monday, 16 March 2015. Categoria: General

ORANJESTAD(AAN): E proceso di resocialisacion y reintegracion den nos comunidad pa
medio di entre otro proyecto y cursonan ta entre e metanan di KIA. Esaki tambe lo yuda disminui
residivismo, esta cu e ex-preso ta bolbe comete un acto castigabel y ta bolbe worde cera.
E director nobo di KIA, Trudy Hassell ta haci un apelacion na nos comunidad pa tuma contacto
cu KIA pa yuda provee e presonan cu trabao. Hunto cu Enseñansa pa Empleo ta ofreciendo un
curso di electrotechniek caba y ta preparando pa ofrece mas curso.
Tambe, e werkplaats ta worde uza atrobe y ta aki e contribucion di nos comunidad ta hunga un
rol importante. Hassell a splica cu e presonan mester di trabao y ta conta cu comunidad pa
provee e tareanan.
E presonan, bao di guia, ta duna auto service y ta spuit auto na “mita di e prijs di mercado”, nan
ta drecha airco y hasta ta traha kitchen cabinet y potchi di mata na un prijs hopi mas abao cu e
prijs riba mercado. Tin hopi cos mas na caminda, Hassell a remarca den un entrevista e siman
aki.
Tur proyecto ta dirigi na e participacion di e detenido, unda cu nan ta traha y e placa cu ta worde
genera ta bay back den e caha yama “arbeidskas” for di cual ta paga pa cursonan pa e
detenidonan y otro necesidadnan manera mantencion di nan mesun espacionan.
E placa di arbeidskas ta locual a worde uza por ehempel pa provee e damanan cu un localidad
nobo, renoba y bunita, pa unda nan a caba di muda e siman aki. E trabao cu ta worde haci den
KIA ta bon y barata y ora trece e trabao aki pa KIA bo ta contribui pa e detenido haya nan
resocialisacion tambe, segun Hassell.
http://www.diario.aw/2015/03/trudy-hassell-ta-haci-un-suplica-na-comunidad-pa-contribui-na-
trabao-pa-e-presonan/