Page 21 - MIN ECEM 16 JUNE 2017

36 AWEMainta Diabierna, 16 Juni 2017

Prome Minister Mike Eman:
“Mas iluminacion por ta algo chikito,

pero e ta cambia henter un bida”

LUZ ta duna respet, pesey e habitantenan di Avicenastraat cu
ta conecta n’e cruzada cu Pasteurstraat ta masha agradecido na
Prome Minister Mike Eman cu e programa Luz den Bario a yega
den nan area tambe.
Por a sinti un alegria grandi bou di e habitantenan presente, di
cual mayoria ta personanan grandi caba, n’e ceremonia diabierna
anochi.

E prome luz LED di caya pa Avicenastraat a wordo poni net di-
lanti e compleho di apartamento di FCCA pa personanan 55+
of personanan cu limitacion.
Tur a expresa alegria grandi cu den oranan di anochi ta bay tin
luz di caya dunando respet na nan vivienda y permitiendo nan
socialisa un poco mas.

A toca honor na Edward Leonardo, kende su famia tin 50 aña
bibando den e caya aki, pa subi den e vehiculo di Elmar cu a hibe
ariba y cende e prome luz di e caya.
“Ta algo hopi emocional pa mira e prome luz di caya aki,” Edward
a bisa ora cu el a yega abou bek y a duna Prome Minister Eman,
un amigo di infancia di dje, un abraso fuerte di agradecimento.

“Ami a nace aki 45 aña pasa den un caya cu tabata den scuridad.
Nos tabata muchanan cu nunca por a hunga un tiki mas laat riba
caya dilanti cas. Asina cu solo baha nos mayornan tabata yama
nos paden pasobra tabata bira scur,” Edward Leonardo a bisa.
Su ruman homber, Eugene tambe a recorda e tempo ey. Awendia,
como adulto, luz tin un otro balor.
“Luz den nos caya ta brinda respet y ta forsa otronan pa respeta
nos propiedad. E ta duna nos seguridad, pero tambe ta permiti
nos sinta pafo combersa cu bisiña den forma trankil.
Semper scuridad ta duna miedo y awor cu luz naturalmente nos
ta sinti trankilidad,” el a bisa.

Habitantenan di e compleho di apartamento di FCCA pa 55+
a celebra e hecho cu luz a yega den nan caya. Den e temponan
aki, luz den un bario ta nifica alegria, cu e muchanan por hunga
un tiki mas laat sin angustia cu algo por pasa.
“Pesey nos ta contento y ta agradecido na Prome Minister Eman,
asina sra. Velasquez, kende ta biba den e compleho di FCCA, a
comenta.

“Hopi, principalmente den politica, lo bisa cu ta algo chikito,
pero p’esnan cu ta biba hopi aña, manera famia Leonardo cu tin
50 aña bibando aki, e luz di caya tin un balor grandi”, Prome
Minister Mike Eman a bisa na final di e ceremonia.

Den tur bishita den barionan, e necesidad pa mas luz ta algo cu
semper tabata bin dilanti. Iluminacion, Prome Minister a bisa,
ta trece ta brinda e ciudadanonan seguridad y trankilidad. “Tin
biaha bo no pensa mas aleu, ya cu e ta algo masha chikito, pero
e ta cambia henter e aspecto di bida.
Principalmente despues cu solo baha. Awe mi a keda asombra,
pasobra esaki ta un caya di hopi aña, di mas cu 50 aña den centro
di ciudad, pero cu pa 50 aña e habitantenan a spera pa por haya
iluminacion. Nos ta contento di por a haci esaki posibel,” Prome
Minister Mike Eman a bisa den presencia di e habitantenan.